Senglao content (728×90)
Senglao content (728×90)

ເຈາະບັນຫາການຝາກລົດ…ໃນນະຄອນຫຼວງ

ໄລຍະຜ່ານມາມີຜູ້ໃຊ້ ເຟສບຸກ ຫຼາຍໆຄົນ ອອກມາໂພສ ຂໍ້ຄວາມກ່ຽວກັບບັນຫາປະກົດການຫຍໍ້ທໍ້ໃນສັງຄົມ ເປັນຕົ້ນແມ່ນ ບັນຫາມີກຸ່ມຄົນບໍ່ດີຈໍານວນໜຶ່ງມາອ້າງຕົນເອງເປັນພະນັກງານເກັບຄ່າຝາກລົດ, ບັນຫາເກັບປີ້ເກີນລາຄາ, ບໍລິການລູກຄ້າບໍ່ສຸພາບ, ເອົາສະຖານທີ່ຝາກລົດໃຫ້ຄົນຕ່າງດ້າວມາເຊົ່າ ແລະ ອື່ນໆ ເຊັ່ນ: ເມື່ອບໍ່ດົນມານີ້ ເກີດບັນຫາລະຫວ່າງ ຜູ້ບໍລິການຝາກລົດທີ່ເປັນຄົນຕ່າງດ້າວ ກັບ ຄົນລາວທີ່ເປັນຜູ້ໃຊ້ບໍລິການ ເມື່ອບັນຫານີ້ ຖືກປ່ອຍລົງໂລກ social ກໍມີກຸ່ມຄົນເຂົ້າມາສະແດງຄວາມຄິດເຫັນຕໍ່ບັນຫາດັ່ງກ່າວຕ່າງໆນາໆ ເຊັ່ນ: ເລື່ອງການສໍາປະທານສະຖານທີ່ຝາກລົດ ຄວນໃຫ້ຄົນລາວສໍາປະທານກໍໄດ້ ບໍ່ຈໍາເປັນຕ້ອງໃຫ້ຕ່າງຊາດມາເຊົ່າ ເພາະເປັນການຍາດອາຊີບຂອງຄົນລາວ ທັງທີ່ນັກທຸລະກິດລາວກໍມີຫຼາຍ ແລະ ອີກບັນຫາໜຶ່ງກໍແມ່ນການສໍ້ໂກງຜູ້ໃຊ້ບໍລິການດ້ວຍການຂຽນຕົວເລກໃສ່ເພື່ອເພີ່ມມູນຄ່າ ໂດຍອ້າງເຫດຜົນຕ່າງໆນາໆ, ກໍລະນີ ທີ່ຈອດລົດແລ້ວລືມເອົາປີ້ ຫຼື ເຮັດປີ້ເສຍ ທາງພະນັກງານເກັບປີ້ຈະຄູນຄ່າປັບໃໝຂຶ້ນຫຼາຍເທົ່າ ແລະ ເວົ້າຄໍາບໍ່ສຸພາບໃສ່ລູກຄ້າ.     ທຸກມື້ນີ້ເກືອບທຸກສະຖານທີ່ໃນນະຄອນຫຼວງ ແມ່ນມີສະຖານທີ່ຝາກລົດ ໂດຍມີຄົນໃຊ້ ເຟສບຸກ ທ່ານໜຶ່ງຈົ່ມວ່າ: ປັດຈຸບັນນີ້ຈະໄປໃສມາໃສ ຕ້ອງມີເງິນແຮຕິດຖົງຢ່າງໜ້ອຍ 50.000 ກີບ ເພາະຈະຈອດລົດແຄມທາງ ກໍໄດ້ເສຍເງິນຄ່າຝາກລົດເກືອບວ່າໝົດທຸກສາຍ ໄປຕະຫຼາດກໍໄດ້ເສຍ, ໄປໂຮງຮຽນກໍເສຍຄ່າຝາກລົດ ບາງມື້ເພິ່ນຢາກຂຶ້ນຄ່າຝາກກໍຂຶ້ນຕາມໃຈ, ບໍ່ພຽງແຕ່ເທົ່ານັ້ນ; ໄປເຮັດບຸນຕັກບາດຢູ່ວັດ ຍັງໄດ້ເສຍຄ່າຝາກລົດອີກ ໂດຍສະເພາະແມ່ນໄລຍະບຸນສິນກິນທານຕ່າງໆ ເຊັ່ນ: ບຸນພຣະທາດຫຼວງ, ບຸນຊ່ວງເຮືອ ຄ່າເກັບປີ້ຈະແພງເປັນພິເສດ. ນອກນີ້ຍັງມີກໍລະນີ ທີ່ມີກຸ່ມຄົນບໍ່ດີຈໍານວນໜຶ່ງແອບອ້າງຕົນເປັນພະນັກງານເກັບເງິນຄ່າຝາກລົດຕາມແຄມທາງ ຊຶ່ງບັນຫານີ້ ໃນກອງປະຊຸມລັດຖະບານສະໄໝສາມັນປະຈໍາເດືອນ ພະຈິກ 2016 ທີ່ໄດ້ໄຂຂຶ້ນເມື່ອວັນທີ 21 ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ເນັ້ນວ່າ: ຕ້ອງເອົາໃຈໃສ່ ກວດກາຄືນ ສະພາບການເກັບເງິນຄ່າຝາກລົດຢູ່ຕາມຈຸດຕ່າງໆ ກຸ່ມຄົນເລາະເກັບເງິນຄ່າຝາກຕາມແຄມທາງ ຖ້າຕົກໃນກໍລະນີຈັບເສືອມືເປົ່າໃຫ້ສັ່ງຢຸດຕິທັນທີໂດຍບໍ່ມີຂໍ້ຍົກເວັ້ນເພາະສ້າງຄວາມເດືອດຮ້ອນໃຫ້ປະຊາຊົນ ໂດຍມີການອ້າງໂຕວ່າເປັນພະນັກງານອົງການພັດທະນາເທສະບານ ຊຶ່ງເປັນການສ້າງຮັ່ງຄູນມີໃຫ້ສ່ວນບຸກຄົນ ແລະ ເງິນດັ່ງກ່າວກໍບໍ່ໄດ້ເຂົ້າລັດ ແຕ່ຍັງເຫັນວ່າມາເຖິງປັດຈຸບັນປະກົດການດັ່ງກ່າວຍັງບໍ່ທັນຖືກແກ້ໄຂເທົ່າທີ່ຄວນ. ຕໍ່ບັນຫາດັ່ງກ່າວນີ້ ທາງທີມງານ ວາລະສານທາເກັດ ໄດ້ລົງສໍາພາດປະຊາຊົນຈໍານວນໜຶ່ງເມື່ອວັນທີ 19 ທັນວາ 2017 ຜ່ານມາ ໂດຍທ່ານເພັດ ອາຊີບ ພະນັກງານເອກະຊົນ ໃຫ້ຄໍາຄິດເຫັນວ່າ: ເພື່ອສະກັດກັ້ນບໍ່ໃຫ້ກຸ່ມຄົນທີ່ແອບອ້າງເປັນພະນັກງານ ອົງການພັດທະນາເທສະບານນັ້ນ ຄວນຫັນການຈ່າຍຄ່າປີ້ລົດແບບຈີກເຈ້ຍຂອງລົດທຸກຊະນິດໃຫ້ເປັນລະບົບ ທັນສະໄໝ ເຊັ່ນ: ຈ່າຍຜ່ານລະບົບ Application ຄືດັ່ງໄລຍະຜ່ານມາທີ່ເຫັນເຈົ້າຂອງ ເຟສ ທ່ານໜຶ່ງໄດ້ປ່ອຍວີດີໂອ ການຊໍາລະເງິນຊື້ຈີ່ກ້ວຍຜ່ານທາງມືຖື ເພາະຖ້າວ່າຫັນມານໍາໃຊ້ລະບົບເຫຼົ່ານີ້ ຈະມີຄວາມປອດໄພຫຼາຍຂຶ້ນ ສາມາດຫຼີກເວັ້ນປະກົດການສໍ້ໂກງໄດ້ ແລະ ທາງການຄວນໃຊ້ມາດຕະການທີ່ເດັດຂາດເພື່ອຄວບຄຸມເຈົ້າຂອງຜູ້ສໍາປະທານ ຈັດລະບຽບໃຫ້ພະນັກງານນຸ່ງເຄື່ອງເປັນລະບຽບ ແລະ ສຶກສາອົບຮົມພະນັກງານໃຫ້ເວົ້າຈາດ້ວຍຄໍາມ່ວນຫູແກ່ລູກຄ້າ, ຄວນຮັບຜິດຊອບຍານພະຫະນະ, ເຄື່ອງຂອງຂອງລູກຄ້າທີ່ເສຍຫາຍ ບໍ່ແມ່ນພຽງແຕ່ຊ່ວຍຈັດສັນບ່ອນຈອດລົດໃຫ້ເທົ່ານັ້ນ ຄືດັ່ງທີ່ເຫັນປີ້ຝາກລົດຫຼາຍໆບ່ອນລະບຸ ຊິຶ່ງເຫັນວ່າມັນເປັນການເອົາປຽບຜູ້ໃຊ້ບໍລິການ.

ທ່ານ ນາງ…ບໍ່ປະສົງອອກນາມ ອາຊີບ ພະນັກງານອາຈານສອນໃນສະຖາບັນແຫ່ງໜຶ່ງ ໃຫ້ຄໍາເຫັນວ່າ: ສ່ວນຕົວແລ້ວຄິດວ່າລາຄາຄ່າຝາກລົດຈະແພງ ຂໍຍົກຕົວຢ່າງ: ຄ່າຝາກ ໃນ ມຊ 2000 ກີບຕໍ່ຄັ້ງ ບາງມື້ໄດ້ຝາກ 2 ຄັ້ງໃນໜຶ່ງມື້ ເມື່ອຄິດໄລ່ເປັນອາທິດໜຶ່ງກໍໝົດໄປແລ້ວບໍ່ຕໍ່າກວ່າ 10-20 ພັນກີບ, ນອກນີ້ ຍັງຄ່ານໍ້າມັນລົດອີກ ໂດຍສະເພາະສະຖານທີ່ດັ່ງກ່າວ ຍິ່ງເປັນສະຖາບັນບ່ອນມີນັກສຶກສາຫຼາຍ ບາງຄົນຖານະຄອບຄົວກໍບໍ່ຄ່ອຍມີ. ຂ້າພະເຈົ້າຄິດວ່າການທີ່ເກັບແບບນີ້ ອາດເປັນຍ້ອນເຈົ້າຂອງຜູ້ສໍາປະທານ ເຊົ່າແພງ ຫຼື ບໍ?  ຫຼືຖ້າດີແທ້ຄວນໃຫ້ເສຍແບບລາຍເດືອນ ໃຊ້ບັດສະມາຊິກຈ່າຍເປັນລາຍເດືອນ ແລະ ຄອກຝາກລົດກໍຢາກໃຫ້ເປັນຄອກຮົ່ມ, ຄວນມຸງຫຼັງຄາ ຫຼື ເອົາຜ້າມາບັງ ເພາະປັດຈຸບັນນີ້ລົດຕາກແດດເກືອບໝົດມື້ ສ່ວນພະນັກງານເກັບປີ້ຄວນຢູ່ເຝົ້າລົດຈົນລົດຈະໝົດຄອກ ເພາະໄລຍະຜ່ານມາເຫັນວ່າ ເມື່ອລົດເຫຼືອໜ້ອຍພະນັກງານເກັບປີ້ຈະໜີປະຄອກລົດ. ອີກກໍລະນີ ທີ່ຄົນຮັບຝາກລົດມັກດ່າ ເມື່ອເຈົ້າຂອງລົດເຮັດປີ້ເສຍ ແມ່ນບໍ່ເໝາະສົມເພາະເຮົາເປັນຜູ້ໃຫ້ບໍລິການຄວນມີມະນຸດສໍາພັນທີ່ດີກັບຜູ້ໃຊ້ບໍລິການ, ຫາກວ່າເຮັດປີ້ລົດເສຍກໍພຽງເອົາໜັງສືລົດ ຫຼື ເອກະສານກ່ຽວຂ້ອງມາຢັ້ງຢືນ ກໍພໍແລ້ວ ບໍ່ຈໍາເປັນປັບໃໝ ຫຼື ຮ້າຍດ່າໃດໆ.

ບັນຫາດັ່ງກ່າວຂ້າງເທິງນັ້ນ ເປັນພຽງສ່ວນໜຶ່ງທີ່ຍົກຂຶ້ນມາ ຊຶ່ງຍັງມີອີກຫຼາຍໆກໍລະນີ ທີ່ເກີດຂຶ້ນກັບການຝາກລົດ ສະນັ້ນ, ເພື່ອສະກັດກັ້ນບັນຫານີ້ ເຮົາທຸກຄົນ ທັງເຈົ້າຂອງຜູ້ສໍາປະທານ, ພະນັກງານຈົດປີ້ ຕະຫຼອດພາກສ່ວນຂອງລັດທີ່ກ່ຽວຂ້ອງ ຄວນເປັນຫູເປັນຕາຊ່ວຍກັນ ເພື່ອເຮັດໃຫ້ບັນຫາດັ່ງກ່າວໝົດໄປຈາກສັງຄົມບ້ານເຮົາໃນອະນາຄົດ.

(ວາລະສານ ທາເກັດ ສະບັບທີ 139 ເດືອນກຸມພາ  2018  ຕາມ M Point Mart, Jeffy Mart ແລະ  U  Express  ຫຼື ສອບຖາມຈອງເປັນ ສະມາຊິກ ໄດ້ທີເບີ 021 216 666)

Comments