Senglao content (728×90)
Senglao content (728×90)

ປັດຈຸບັນ ມີການສຶກສາ, ​ສຳຫຼວດສ້າງແຫຼ່ງຜະລິດພະລັງງານໄຟຟ້າໃນລາວ 443 ໂຄງການ.

ສປປ ລາວ ມີທ່າແຮງດ້ານຊັບພະຍາກອນທຳມະຊາດທີ່ອຸດົມສົມບູນ ທີ່ເປັນເງື່ອນໄຂໃນການສ້າງແຫຼ່ງຜະລິດພະລັງງານ, ປັດຈຸບັນ,​ ໄດ້ມີການສຶກສາ, ສຳຫຼວດແຫຼ່ງຜະລິດພະລັງງານແລ້ວເຖິງ 443 ໂຄງການ. ໃນຂອບເຂດທົ່ວປະເທດ ເຊິ່ງມີກຳລັງຕິດຕັ້ງຫຼາຍກວ່າ 30.000 ເມກາວັດ,  ຜ່ານມາລັດຖະບານເຫັນໄດ້ຈາກທ່າແຮງທີ່ມີພາຍໃນປະເທດ. ຈຶ່ງໄດ້ອະນຸມັດໃຫ້ມີການລົງທຶນເຂົ້າໃນໂຄງການຜະລິດພະລັງງານໄຟຟ້າ ທີ່ເປັນຕົວຂັບເຂື່ອນໃນຂະແໜງການລົງທຶນ ພ້ອມທັງຊຸກຍູ້ເສດຖະກິດໃຫ້ມີການຂະຫຍາຍຕົວຢ່າງຕໍ່ເນື່ອງສະເລ່ຍ 6-8% ຕໍ່ປີ ຕະຫຼອດໄລຍະທີ່ຜ່ານມາ.

 

ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ກ່າວໃນເວທີ ໜຶ່ງແລວທາງໜຶ່ງເສັ້ນທາງວ່າ: ປັດຈຸບັນນີ້, ໄດ້ມີການສຶກສາສຳຫຼວດແຫຼ່ງຜະລິດພະລັງງານແລ້ວ ເຖິງ 443 ໂຄງການ ເຊິ່ງມີກຳລັງຕິດຕັ້ງຫຼາຍກວ່າ 30.000 ເມກາວັນ. ໃນນີ້, ປະກອບມີ: ພະລັງງານແສງຕາເວັນ, ພະລັງງານລົມ, ພະລັງງານຖ່ານຫີນ, ໄບໂອເມັສ. ພິເສດສະເພາະຊັບພະຍາກອນແຫຼ່ງນໍ້າທໍາມະຊາດ ຍັງຈະສາມາດຜະລິດພະລັງງານໄຟຟ້າປະມານ 26.000 ກວ່າເມກາວັດ ຫຼື ກວ່າ 200 ເຂື່ອນ.

ປັດຈຸບັນ, ທົ່ວປະເທດມີແຫຼ່ງຜະລິດພະລັງງານໄຟຟ້າທັງໝົດ 48 ແຫ່ງ ມີກຳລັງຕິດຕັ້ງທັງໝົດ 6.551 ເມກາວັດ ແລະ ສາມາດຜະລິດພະລັງງານໄຟຟ້າໄດ້ເຖິງ 35.549,5 ກິກະວັດໂມງຕໍ່ປີ. ນອກນີ້, ຍັງມີໂຄງການທີ່ພວມລົງມືກໍ່ສ້າງ ແລະ ກຳລັງຈະລົງມືກໍ່ສ້າງທັງໝົດໃນທົ່ວປະເທດ ຈຳນວນ 52 ແຫ່ງ ທີ່ມີກຳລັງຕິດຕັ້ງທັງໝົດ 6.511 ເມກາວັດ ແລະ ສາມາດຜະລິດພະລັງງານໄຟຟ້າໄດ້ເຖິງ 31.395,5 ກິກະວັດໂມງຕໍ່ປີ ຄາດຄະເນວ່າຈະສຳເລັດທັງໝົດຮອດປີ 2020-2021 ແລະ ໃນເວລານັ້ນ ສປປ ລາວ ຈະມີແຫຼ່ງຜະລິດພະລັງງານໄຟຟ້າ 100 ແຫ່ງ, ມີກຳລັງຕິດຕັ້ງປະມານ 13.062 ເມກາວັດ ແລະ ມີກຳລັງຜະລິດປະມານ 66.944 ກິກະວັດໂມງຕໍ່ປີ. ໃນນີ, ປະມານ 85% ຈະສົ່ງອອກໄປຈຳໜ່າຍຢູ່ຕ່າງປະເທດ.

ທ່ານກ່າວຕື່ມວ່າ: ສຳລັບການສົ່ງອອກພະລັງານໄຟຟ້າໄປຕ່າງປະເທດເຊັ່ນ: ປະເທດໄທ,​ ຫວຽດນາມ, ກຳປູເຈຍ, ມຽນມາ ໄດ້ຈຳນວນເພີ່ມຂຶ້ນເຖິງ 4 ເທົ່າ ເມື່ອທຽບກັບປີ 2010  ແລະ ມີທ່າອ່ຽງເພີ່ມຂຶ້ນໃນແຕ່ລະປີ. ພິເສດ ສປປ ລາວ ກໍໄດ້ມີການຮ່ວມມືຢ່າງແໜ້ນແຟ້ນໃນການແລກປ່ຽນພະລັງງານກັບ ສປ ຈີນ ໂດຍສະເພາະກັບແຂວງຢຸນນານ ກໍຄືລັດວິສາຫະກິດຕາຂ່າຍໄຟຟ້າພາກໃຕ້ ສປ ຈີນ (CSG). ນອກຈາກນນີ້, ສປປ ລາວ ຍັງຖືເປັນສຳຄັນການພັດທະນາພະລັງງານທົດແທນ ເປັນຕົ້ນການພັດທະນາໄຟຟ້າຈາກແສງຕາເວັນ, ພະລັງງານຊີວະມວນ, ພະລັງງານລົມ ແລະ ອື່ນໆ.

ທີ່ມາ: ຂ່າວເສດຖະກິດ-ການຄ້າ

Comments