Senglao content (728×90)
Senglao content (728×90)

ເກີດເຫດໄຟໄໝ້ສະໜາມຖິ້ມຂີ້ເຫຍື້ອ ຫຼັກ 32 ຫຼາຍພາກສ່ວນເລັ່ງຫາວິທີມອດໄຟ

ເວລາ 13:00 ໂມງ ຂອງວັນທີ 4 ມີນາ 2018 ທີ່ຜ່ານ ໄດ້ເກີດເຫດໄຟໄໝ້ສະໜາມຖິ້ມຂີ້ເຫຍື້ອ ຫຼັກ 32. ເຮັດໃຫ້ສົ່ງຜົນກະທົບຕໍ່ປະຊາຊົນ ແລະ ສະພາບແວດລ້ອມອ້ອມຂ້າງ, ອາກາດເປັນຜິດທີ່ຮຸນແຮງ. ປັດຈຸບັນ, ຫຼາຍພາກສ່ວນໄດ້ປຶກສາຫາລືເລັ່ງຫາວິທີມອດໄຟ.

ໃນຕອນເຊົ້າຂອງວັນທີ 5 ມີນາ 2018 ຜ່ານມາ ທີ່ຫ້ອງວ່າການປົກຄອງເມືອງໄຊທານີ ນະຄອນຫຼວງວຽງຈັນ ໄດ້ມີການຈັດກອງປະຊຸມປຶກສາຫາລືວິທີມອດໄຟສະໜາມຖິ້ມຂີ້ເຫຍື້ອ ຫຼັກ 32 ພາຍໃຕ້ການເປັນປະທານຂອງ ທ່ານ ແກ້ວພິລາ ວັນອາໄພລາດ ຮອງເຈົ້າຄອງນະຄອນຫຼວງວຽງຈັນ, ມີບັນດາເຈົ້າເມືອງ – ຮອງເຈົ້າເມືອງໆໄຊທານີ, ຫົວໜ້າຫ້ອງການຄຸ້ມຄອງ ແລະ ບໍລິຫານຕົວເມືອງວຽງຈັນ ( ຄບຕ ) ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມດັ່ງກ່າວໄດ້ມີການປຶກສາຫາລື ແລະ ຫາວີທີມອດໄຟ ສະໜາມຂີ້ເຫຍື້ອ ຫຼັກ 32 ໂດຍຈະໃຊ້ດັ່ງນີ້:
1). ຈະໃຊ້ວິທີເອົານ້ຳສີດ ແລະ ເອົາດິນຖົມ ເພື່ອເຮັດໃຫ້ໄຟທີ່ໄໝ້ຂີ້ເຫຍື້ອຢູ່ພື້ນບໍ່ໃຫ້ມີອາກາດ;
2). ຈະຍົກຍ້າຍປະຊາຊົນຊົ່ວຄາວໃນເຂດໃກ້ຄຽງທີ່ໄດ້ຮັບຜົນກະທົບ.
3). ຈະໃຊ້ເຄມີໃນການດັບໄຟ.

ທ່ານ ໄກສອນ ວິວົງສາ ຮອງໜ່ວຍງານສະໜາມບໍາບັດຂີ້ເຫຍື້ອ ຫຼັກ 32 ກ່າວວ່າ: ເຫດການໄຟໄໝ້ດັ່ງກ່າວຖືວ່າຮ້າຍແຮງກວ່າທຸກປີ ແລະ ໃນຂະນະຕອນເກີດເຫດນັ້ນແມ່ນມີລົມແຮງ ແລະ ອາກາດຮ້ອນຫຼາຍ ໂດຍຄາດວ່າຕົ້ນເຫດການເກີດໄຟໄໝ້ໃນຄັ້ງນີ້ມາຈາກສະເກັດໄຟໄໝ້ປ່າ ແລະ ປິວໃສ່ກອງຂີ້ເຫຍື້ອແລ້ວເກີດການລຸກລາມຢ່າງວ່ອງໄວຈົນຍາກທີ່ຈະຄວບຄຸມໄດ້ ເຊິ່ງພວກເຮົາໄດ້ໃຊ້ລົດດັບເພີງເຖິງ 10 ຄັນ ບວກກັບລົດຂອງ ຄບຕ 5 ຄັນ, ທີມລົດນໍ້າ 5 ຄັນ ( ໃນມື້ໜຶ່ງລົດຄັນ 1 ຫົດນ້ຳໄດ້ 4 – 5 ຖ້ຽວ ) ແລະ ໃຊ້ແຮງງານຄົນທັງໝົດປະມານ 35 ກວ່າຄົນ ເຊິ່ງໃຊ້ເວລາປະມານ 6 ຊົ່ວໂມງຈຶ່ງສາມາດຄວບຄຸມໄຟໄດ້ໃນລະດັບໜຶ່ງ.

ມາຮອດປັດຈຸບັນພວກເຮົາກໍ່ຄວບຄຸມໄຟໃຫ້ຢູ່ໃນຂອບເຂດບໍລິເວນຂອງສະໜາມ ແລະ ບໍ່ໃຫ້ລຸກລາມໄປຂ້າງນອກ. ສ່ວນມາດຕະການໃນການມອດໄຟໃຫ້ດັບສະໜິດນັ້ນພວກເຮົາໃຊ້ວິທີເອົານ້ຳສີດ ແລະ ເອົາດິນຖົມ ເພື່ອເຮັດໃຫ້ໄຟທີ່ໄໝ້ຂີ້ເຫຍື້ອຢູ່ພື້ນດິນບໍ່ໃຫ້ມີອາກາດ ແລະ ຈະໃຊ້ເຄມີໃນການດັບໄຟ.
ນອກຈາກນີ້, ທ່ານ ວັນນະ ພັນພົງສາ ຮອງຫົວໜ້າພະແນກຕິດຕາມ ແລະ ວິໄຈຄຸນນະພາບສິ່ງແວດລ້ອມ ສະຖາບັນຄົ້ນຄວ້າຊັບພະຍາກອນທຳມະຊາດ ແລະ ສິ່ງແວດລ້ອມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມຄະນະໄດ້ມີການຕັ້ງເຄື່ອງວັດຄວັນຝຸ່ນລະອອງຂອງສະພາບອາກາດໃນເຂດດັ່ງກ່າວວ່າຈະເກີນຄ່າມາດຕະຖານ ຫຼື ບໍ່? ເຊິ່ງຄາດວ່າຈະສາມາດເກັບກຳຂໍ້ມູນໄດ້ພາຍຫຼັງຕິດຕັ້ງ 24 ຊົ່ວໂມງ. ພ້ອມດຽວກັນນີ້, ທ່ານຍັງໄດ້ໃຫ້ຄວາມຮູ້ເບື້ອງຕົ້ນກ່ຽວກັບການປ້ອງກັນຕົນເອງຈາກຄວັນ ກໍ່ຄືໃຫ້ໃຊ້ຜ້າປິດປາກ – ດັງ.

ທີ່ມາ: ຂ່າວເສດຖະກິດ-ການຄ້າ Lao Economic Daily
ເວັບໄຊ: http://laoedaily.com.la/

 

Comments