Senglao content (728×90)
Senglao content (728×90)

ການປັບປຸງກໍ່ສ້າງສະໜາມບິນວັດໄຕ ໃກ້ຈະສຳເລັດແລ້ວ ຄາດມອບ – ຮັບໃນເດືອນກໍລະກົດນີ້

ໂຄງການປັບປຸງອາຄານຜູ້ໂດຍສານຂອງສະໜາມບິນສາກົນວັດໄຕ ໃກ້ຈະສຳເລັດແລ້ວ, ມາຮອດປັດຈຸບັນມີຄວາມຄືບໜ້າແລ້ວ 81%, ສ່ວນການຂະຫຍາຍອາຄານຜູ້ໂດຍສານສາກົນກໍ່ເກືອບຈະສຳເລັດທັງໝົດ, ຂະນະທີ່ອາຄານຜູ້ໂດຍສານພາຍໃນກຳລັງເລັ່ງກໍ່ສ້າງ ໂດຍຈະໃຫ້ສຳເລັດທັງໝົດໃນເດືອນມິຖຸນາ ແລະ ຈະມີພິທີມອບ – ຮັບໃນເດືອນກໍລະກົດທີ່ຈະມາເຖິງນີ້.

ທ່ານ ສີສະຫງວນ ຈັນທະວົງ ຫົວໜ້າໂຄງການປັບປຸງອາຄານສະໜາມບິນສາກົນວັດໄຕ ເປີດເຜີຍຕໍ່ສື່ມວນຊົນເມື່ອວັນທີ 2 ມີນາຜ່ານມາ ວ່າ: ໂຄງການປັບປຸງສະໜາມບິນສາກົນວັດໄຕ ເປັນການຂະຫຍາຍອາຄານຜູ້ໂດຍສານສາກົນ ແລະ ກໍ່ສ້າງອາຄານຜູ້ໂດຍສານພາຍໃນຫຼັງໃໝ່ ລວມທັງເຮືອນສ້ອມແປງສະໜາມບິນ, ເສັ້ນທາງແວ່ ( Taxiway ) ເສັ້ນໃໝ່, ປັບປຸງເສັ້ນທາງເຂດບໍລິການບ່ອນຈອດລົດ ແລະ ສິ່ງອຳນວຍຄວາມສະດວກຕ່າງໆ ໂດຍສະເພາະແມ່ນຂອດການຮັກສາຄວາມປອດໄພພາຍໃນສະໜາມບິນ ໂດຍແມ່ນທຶນກູ້ຢືມດອກເບ້ຍຕ່ຳຈາກລັດຖະບານຍີ່ປຸ່ນ ໃນໂຄງການຊ່ວຍເຫຼືອເພື່ອການພັດທະນາ ຫຼື ( ODA ) ຈຳນວນ 61 ລ້ານໂດລາສະຫະລັດ ແລະ ບໍລິສັດ ຮາຊາມະ ແອນໂດ ( HAZAMA ANDO ) ເປັນຜູ້ຮັບເໝົາກໍ່ສ້າງ.


ທ່ານກ່າວອີກວ່າ: ໃນໄລຍະຜ່ານມາມີຈຳນວນຜູ້ໂດຍສານໄດ້ເພີ່ມຂຶ້ນທຸກປີ ໂດຍປີ 2000 – 2009 ມີຜູ້ໂດຍສານເພີ່ມຂຶ້ນ 9%, ໃນປີ 2013 ຮອງຮັບຖ້ຽວບິນສາຍຕ່າງປະເທດ 202 ຖ້ຽວ ແລະ ພາຍໃນ 270 ຖ້ຽວຕໍ່ອາທິດ, ໃນປີ 2016 ມີຜູ້ໂດຍສານເພີ່ມຂຶ້ນເປັນ 1,5 ລ້ານກວ່າຄົນ. ໃນນັ້ນ, ຜູ້ໂດຍສານສາຍຕ່າງປະເທດ 1.108.000 ຄົນ ເຊິ່ງການເພີ່ມຂຶ້ນດັ່ງກ່າວແມ່ນໄວກວ່າການຄາດຄະເນເບື້ອງຕົ້ນ ເຊິ່ງການຄາດຄະເນເບື້ອງຕົ້ນແມ່ນຮອດປີ 2023 ຈຳນວນຜູ້ໂດຍສານຈະມີປະມານ 1,5 ລ້ານຄົນ ເຊິ່ງປັດຈຸບັນຜູ້ໂດຍສານໄດ້ຈຸເພດານການຄາດຄະເນດັ່ງກ່າວແລ້ວ.

ດັ່ງນັ້ນ, ຈຶ່ງຈຳເປັນຕ້ອງໄດ້ປັບປຸງ ແລະ ຂະຫຍາຍອາຄານຜູ້ໂດຍສານສາກົນ ແລະ ກໍ່ສ້າງອາຄານຜູ້ໂດຍສານພາຍໃນເພື່ອຮອງຮັບການເພີ່ມຂຶ້ນຢ່າງໄວວາ ເຊິ່ງການປັບປຸງຄັ້ງນີ້ຈະສາມາດຮອງຮັບຜູ້ໂດຍສານໄດ້ປະມານ 3 ລ້ານຄົນຕໍ່ປີ ຫຼື ປະມານ 700 ຄົນຕໍ່ຄັ້ງ ໃນຊົ່ວໂມງເລັ່ງດ່ວນ ( ແຕ່ 10:00 ໂມງ – 13:00 ໂມງ ).


ໂຄງການດັ່ງກ່າວໄດ້ຂະຫຍາຍອາຄານຜູ້ໂດຍສານສາຍຕ່າງປະເທດອອກຍາວ 45 ແມັດ ເຊິ່ງໄດ້ປັບປຸງຫຼາຍຂອດ ໂດຍສະເພາະແມ່ນການຮັກສາຄວາມປອດໄພ, ໃນຂະນະທີ່ຈຸດກວດຄົນເຂົ້າ – ອອກເມືອງ( ຕມ ) ຂາອອກ ຈາກເດີມບໍລິການ 8 ປ່ອງ ເພີ່ມຂຶ້ນເປັນ 13 ປ່ອງ, ສ່ວນຂາເຂົ້າ ຈາກເດີມ 8 ປ່ອງ ເພີ່ມຂຶ້ນເປັນ 15 ປ່ອງ,ສ່ວນທາງຂຶ້ນ – ລົງຂອງຜູ້ໂດຍສານ ເຊິ່ງເມື່ອກ່ອນແມ່ນຊ່ອງທາງດຽວກັນ ( ຍ່າງສວານກັນ ), ແຕ່ຫຼັງຈາກປັບປຸງແມ່ນຈະໄປຄົນລະຊ່ອງທາງ ໂດຍມີຂັ້ນໄດເລື່ອນ 11 ຈຸດ ແລະ ລິບອີກ 9 ຈຸດ ເພື່ອອຳນວຍຄວາມສະດວກໃຫ້ແກ່ຜູ້ໂດຍສານ.

ການປັບປຸງຄັ້ງນີ້ໄດ້ເຮັດໃຫ້ອາຄານສະໜາມບິນສາກົນວັດໄຕ ກວ້າງຂວາງຂຶ້ນ, ມີຄວາມທັນສະໄໝຂຶ້ນຫຼາຍຫາກທຽບໃສ່ໄລຍະຜ່ານມາ.

ທີ່ມາ: ຂ່າວສານເສດຖະກິດ-ການຄ້າ.

Comments