Senglao content (728×90)
Senglao content (728×90)

ຖ້າທ່ານມັກປີນຜາຕ້ອງໄປ Greenclimbers home

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ເວັບໄຊທາເກັດ ຈະມາແນະນໍາໃຫ້ທຸກທ່ານໄດ້ຮູ້ຈັກສະຖານທີ່ທ່ອງທ່ຽວແບບປະຈົນໄພແຫ່ງໜຶ່ງ ຢູ່ທີ່ແຂວງຄໍາມ່ວນ ທີ່ເລີ່ມໃຫ້ບໍລິການມາແຕ່ປີ 2011 ເຊິ່ງຫຼາຍທ່ານອາດເຄີຍໄດ້ຍິນແຕ່ຊື່ແຕ່ຍັງບໍ່ເຄີຍໄດ້ໄປລອງສໍາຜັດ ຖ້າທ່ານໃດມັກການປະຈົນໄພມັກຄວາມທ້າທາຍ ຫ້າມພາດກັບສະຖານທີ່ນີ້ຄື: Greenclimbers home.

Greenclimbers home ຕັ້ງຢູ່ບ້ານ ກວນຜາວັງ ເມືອງທ່າແຂກ ແຂວງຄໍາມ່ວນ ຫ່າງຈາກຕົວເມືອງທ່າແຂກປະມານ 16 ກິໂລແມັດ ແລະ Greenclimbers home ແຫ່ງນີ້ເປັນແຫຼ່ງທ່ອງທ່ຽວແບບປະຈົນໄພ ແບບທ້າທາຍ ດ້ວຍການປີນໜ້າຜາທີ່ມີຄວາມສູງຈາກໜ້າດິນຂຶ້ນເຖິງຫຼັງຜາປະມານ 60 ແມັດຫາ 400 ກວ່າແມັດ ແລະ ກໍາລັງກາຍເປັນທີ່ນິຍົມຂອງນັກທ່ອງທ່ຽວຕ່າງປະເທດ ຜູ້ທີ່ມັກປະຈົນໄພ, ມັກຄວາມທ້າທາຍເຊັ່ນ: ປະເທດເຢຍລະມັນ, ຝຣັ່ງ, ສິງກະໂປ, ຍີ່ປຸ່ນ, ໄທ, ອີຕາລີ, ອົດສະຕາລີ ແລະ ອີກຫຼາຍໆປະເທດ, ສໍາລັບຄົນລາວເຮົາແລ້ວ ຜູ້ທີ່ມັກຄວາມທ້າທາຍກໍບໍ່ຄ່ອຍມີຫຼາຍປານໃດ.

ແຕ່ຖ້ານັກທ່ອງທ່ຽວທ່ານໃດ ທີ່ບໍ່ກ້າປີນໜ້າຜາເພິ່ນກໍຍັງມີກິດຈະກໍາ ຍ່າງປ່າ, ລ່ອງເຮືອເຊິ່ງໂດຍສະເລ່ຍແລ້ວພາຍໃນເດືອນໜຶ່ງ ຈະມີນັກທ່ອງທ່ຽວມາປີນໜ້າຜາ ແລະ ພັກຢູ່ຣີສອດ ປະມານ 250 ຫາ 400 ກວ່າຄົນ ສໍາລັບລາຄາເຊົ່າຣີສອດຄືນລະ 169.000 ກີບ ພ້ອມນີ້ຍັງມີຮ້ານອາຫານໄວ້ຄອຍບໍລິການ ເຊິ່ງເປີດຕັ້ງແຕ່ 7 ໂມງເຊົ້າຫາ 22ໂມງ.

ສໍາລັບຈຸດປີນໜ້າຜາ ແລະ ຣີສອດມີຢູ່ສອງຈຸດຄື: ຈຸດທີໜຶ່ງຢູ່ໃກ້ກັບທາງໃຫຍ່, ຈຸດທີ່ສອງເຂົ້າໄປຕາມທາງດິນແດງປະມານ 800 ແມັດ ເຊິ່ງນັກທ່ອງທ່ຽວສາມາດຂີ່ລົດເຂົ້າໄປເອງໄດ້ ຫຼື ຍ່າງເຂົ້າໄປເອງໄດ້ ແຕ່ຈະຍາກລໍາບາກແດ່ໃນໄລຍະລະດູຝົນ, ຢູ່ຈຸດທີ່ສອງນີ້ຈະມີບ່ອນປີນໜ້າຜາຫຼາຍກວ່າ ເພາະບ່ອນປີນຈະຢູ່ອ້ອມຣີສອດ.

ນອກຈາກນີ້ຢູ່ໃກ້ຄຽງ ຍັງມີອີກຈຸດໜຶ່ງທີ່ສ້າງຂຶ້ນໃໝ່ຄື: ທ່າຝຣັ່ງ ເຊິ່ງຫ່າງຈາກຈຸດທີ່ສອງປະມານ 1 ກິໂລແມັດ ໃນແຕ່ລະປີເມື່ອເຖິງທ້າຍເດືອນ ພຶດສະພາ ຈະປິດບໍລິການ ຍ້ອນເປັນລະດູຝົນເຮັດໃຫ້ການປີນໜ້າຜາຍາກ ແລະ ຈະເປີດໃຫ້ບໍລິການໃນຕົ້ນເດືອນ ຕຸລາ ຂອງທຸກໆປີ.

ອຸປະກອນປີນໜ້າຜາຕ່າງໆສາມາດເຊົ່າໄດ້ ຫຼື ຊື້ເປັນແພ໊ກເກສແບບເຄິ່ງມື້, ມື້ໜຶ່ງກໍໄດ້ ແຕ່ຖ້ານັກທ່ອງທ່ຽວຄົນໃດມີປະສົບການປີນໜ້າຜາມາກ່ອນແລ້ວ ກໍສາມາດເຊົ່າແຕ່ອຸປະກອນໄດ້ ແຕ່ຖ້າຍັງບໍ່ມີປະສົບການຂໍແນະນໍາໃຫ້ຊື້ແບບແພ໊ກເກສດີກວ່າ ເພາະຈະມີທັງອຸປະກອນປີນໜ້າຜາ ແລະ ມີຜູ້ມາແນະນໍາວິທີການໃຊ້ອຸປະກອນ, ວິທີປີນຕ່າງໆໃຫ້. ເຊິ່ງລາຄາເຊົ່າແຕ່ອຸປະກອນເຊັດໜຶ່ງສໍາລັບສອງຄົນປີນ ແມ່ນປະມານ 545.000 ກີບ, ຊື້ແບບແພ໊ກເກສເຄິ່ງມື້ ແມ່ນປະມານ 425.000 ກີບ ຕໍ່ໜຶ່ງຄົນ ແຕ່ຖ້າມີສອງຄົນສາມຄົນ ລາຄາກໍຈະຫຼຸດລົງ, ຊື້ແພ໊ກເກສແບບມື້ໜຶ່ງຖ້າລູກຄ້າຄົນໜຶ່ງກໍປະມານ 750.000 ກີບ. ຫຼັງຈາກເຊົ່າອຸປະກອນ ຫຼື ແພ໊ກເກສເປັນທີ່ຮຽບຮ້ອຍແລ້ວ ເວລາຈະໄປປີນໜ້າຜາກໍຈະໄດ້ເສຍຄ່າຜ່ານປະຕູເຂົ້າໄປອີກ 20.000 ກີບ/ຄົນ.

ສ່ວນທາງດ້ານຄວາມປອດໄພແລ້ວຈະມີປະກັນໄພກ່ຽວກັບສະຖານທີ່ເທົ່ານັ້ນ ຈະບໍ່ມີປະກັນໄພກ່ຽວກັບລູກຄ້າຄື: ຖ້າລູກຄ້າເກີດອຸບັດຕິເຫດຕົກຈາກໜ້າຜາ ທາງບໍລິສັດຈະຊ່ວຍເລື່ອງອໍານວຍຄວາມສະດວກ ຫຼື ປະຖົມພະຍາບານຂັ້ນຕົ້ນໃຫ້ລູກຄ້າ. ແຕ່ສ່ວນຫຼາຍນັກທ່ອງທ່ຽວທີ່ມາປີນໜ້າຜາ ແມ່ນຈະມີປະກັນໄພຊີວິດຂອງເຂົາເຈົ້າຢູ່ແລ້ວ ແລະ ກ່ອນທີ່ນັກທ່ອງທ່ຽວຈະເຂົ້າມາປີນຜາ ຈະມີແບບຟອມຂໍ້ຕົກລົງ ລະຫວ່າງບໍລິສັດ ກັບ ນັກທ່ອງທ່ຽວ ຖ້າເກີດອຸບັດຕິເຫດແມ່ນໃຜເປັນຜູ້ຮັບຜິດຊອບດ້ານໃດແດ່ ໄວ້ໃຫ້ນັກທ່ອງທ່ຽວໄດ້ອ່ານ ແລະ ເຊັນຮັບຮູ້ກ່ອນ ເຊິ່ງຜ່ານມາກໍບໍ່ເຄີຍມີນັກທ່ອງທ່ຽວທີ່ປີນໜ້າຜາແລ້ວຜິດພາດຕົກລົງມາ ມີແຕ່ເຈັບຕາມຂໍ້ມື, ມືບາດ ຍ້ອນຫີນບາດ.

ຖ້າທ່ານໃດມັກຄວາມທ້າທາຍ ຫຼື ມັກການປະຈົນໄພຢ່າລືມໄປທ່ຽວສະຖານທີ່ແຫ່ງນີ້ ຮັບຮອງວ່າທ່ານຈະບໍ່ຜິດຫວັງກັບຄວາມທ້າທາຍຢ່າງແນ່ນອນ ນອກຈາກນີ້ແລ້ວຢູ່ບໍລິເວນໃກ້ໆຈຸດປີນໜ້າຜາ ຍັງມີແຫຼ່ງທ່ອງທ່ຽວຫຼາຍຈຸດເຊັ່ນ: ຖໍ້ານາງແອ່ນ, ຖໍ້າຊ້າງ, ຖໍ້າພະ, ທ່າຝຣັ່ງ ແລະ ຖໍ້າຊຽງລຽບ. ຖ້າທ່ານໃດຢາກຊື້ເຄື່ອງປ່າຂອງດົງກໍສາມາດແວ່ຊື້ໄດ້ ເຊິ່ງກາຍຈາກຈຸດປີນໜ້າຜາໄປປະມານ 1 ກິໂລແມັດກໍຈະມີຮ້ານຂາຍເຄື່ອງປ່າຂອງດົງໄວ້ໃຫ້ທ່ານໄດ້ເລືອກຊື້.

 

 

Comments