Senglao content (728×90)
Senglao content (728×90)

ສູນກາງສະຫະພັນແມ່ຍິງລາວ ສະເຫຼີມສະຫຼອງວັນແມ່ຍິງສາກົນຄົບຮອບ 108 ປີ

ວັນທີ 8 ມີນາແມ່ນເຫດການ-ການເມືອງທີ່ສໍາຄັນ, ເປັນຂີດໝາຍແຫ່ງໄຊຊະນະຂອງຂະບວນການແມ່ຍິງສາກົນໃນການຕໍ່ສູ້ທວງເອົາສິດ, ຜົນປະໂຫຍດອັນເປັນທໍາໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖິງຄຸນງາມຄວາມດີຂອງແມ່ຍິງທີ່ໄດ້ຕໍ່ສູ້ ເພື່ອປົດປ່ອຍຕົນເອງແລະທວງເອົາສິດສະເໝີພາບປະຊາທິປະໄຕຄືກັບຜູ້ຊາຍຊຶ່ງໄດ້ທວງໃຫ້ພວກນາຍທຶນໄດ້ແກ້ໄຂຊີວິດການເປັນຢູ່ຂອງແມ່ຍິງພາຍໃຕ້ຄໍາຂວັນ“ຜູ້ໜຶ່ງເຮັດວຽກມື້ລະ 8 ຊົ່ວໂມງ, ແມ່ຍິງແລະຜູ້ຊາຍເຮັດວຽກຄືກັນຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸຂະພາບຂອງແມ່ຍິງແລະເດັກນ້ອຍ, ຕ້ານສົງຄາມຮຸກຮານ, ປົກປັກຮັກສາສັນຕິພາບຂອງໂລກ”ນັບແຕ່ນັ້ນມາວັນທີ 8 ມີນາຈຶ່ງເປັນ“ວັນແມ່ຍິງສາກົນ”,ຊຶ່ງທຸກໆປີແມ່ຍິງໃນທົ່ວໂລກກໍໄດ້ພ້ອມກັນສະເຫຼີມສະຫຼອງຢ່າງເປັນຂະບວນຟົດຟື້ນກວ້າງຂວາງ.

ໃນໂອກາດສະເຫຼີມສະຫຼອງວັນທີ 8 ມີນາວັນແມ່ຍິງສາກົນຄົບຮອບ 108ປີ (08/03/ 1910-08/03/2018)  ສູນກາງສະຫະພັນແມ່ຍິງລາວ (ສສຍລ) ຮ່ວມກັບກະຊວງສາທາລະນະສຸກໄດ້ຈັດພິທີໂຮມຊຸມນຸມພາຍໃຕ້ຄໍາຂວັນທີ່ວ່າ: “ເຖິງເວລາແລ້ວທີ່ທຸກຄົນຕ້ອງຮ່ວມມືກັນປັບປຸງຊີວິດການເປັນຢູ່ຂອງແມ່ຍິງໃນຕົວເມືອງແລະຊົນນະບົດໃຫ້ໄດ້ຮັບການປ່ຽນແປງເພື່ອຄຸນນະພາບທີ່ດີຂຶ້ນ”ໃນວັນທີ 7 ມີນາ 2018 ທີ່ສູນອົບຮົມແມ່ຍິງລາວ. ໃຫ້ກຽດເຂົ້າຮ່ວມພິທີມີ ທ່ານ ດຣ ນາງ ອິນລາວັນ ແກ້ວບຸນພັນ ກໍາມະການສູນກາງພັກປະທານຄະນະບໍລິຫານງານສສຍລ,ທ່ານ ຄໍາໃບ ດໍາລັດ ກໍາມະການສູນກາງພັກຮອງປະທານສູນກາງແນວລາວສ້າງຊາດ, ທ່ານ ປ້ານາລີ ສີສຸລິດ ພັນລະຍາ ທ່ານນາຍົກລັດຖະມົນຕີແຫ່ງສປປລາວ, ທ່ານ ຄໍາພອນພຸດທະວົງ ຮອງລັດຖະມົນຕີກະຊວງສາທາລະນະສຸກ, ມີບັນດາທ່ານຮອງປະທານ, ຄະນະບໍລິຫານງານສສຍລ, ກະຊວງ-ອົງການພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.

ທ່ານນາງ ບັນດິດ ປະທຸມວັນ ຮອງປະທານຄະນະບໍລິຫານງານ ສສຍລ ໄດ້ກ່າວປາໄສຕໍ່ພິທີເຊິ່ງບາງຕອນທ່ານໄດ້ກ່າວເຖິງມູນເຊື້ອວັນແມ່ຍິງສາກົນໂດຍໄດ້ຍົກໃຫ້ເຫັນປະຫວັດຄວາມເປັນມາ, ແນວທາງນະໂຍບາຍຂອງພັກລັດຕໍ່ການພັດທະນາ, ການປົກປ້ອງສິດຜົນປະໂຫຍດຂອງແມ່ຍິງແລະການສົ່ງເສີມຄວາມສະເໝີພາບລະຫວ່າງຍິງຊາຍໃນສປປລາວຊຶ່ງໄດ້ກໍານົດແຈ້ງໃນລັດຖະທໍາມະນູນແລະກົດໝາຍຕ່າງໆ.ຈາກນັ້ນ,ຜູ້ເຂົ້າຮ່ວມຍັງໄດ້ຮັບຟັງການສໍາມະນາໃນຫົວຂໍ້:ການປັບປຸງຊີວິດການເປັນຢູ່ຂອງແມ່ຍິງທີ່ດ້ອຍໂອກາດໃນຕົວເມືອງແລະຊົນນະບົດຈາກຜູ້ຕາງໜ້າອົງການແຄນາໆຊາດ, ບົດບາດຂອງແມ່ຍິງໃນການພັດທະນາຈາກຜູ້ຕາງໜ້າອົງການອັອກຟາມ (OXFAM), ການຮັກສາສຸຂະພາບຕາຈາກຜູ້ຕາງໜ້າກະຊວງສາທາລະນະສຸກແລະບັນຫາການແຕ່ງານກ່ອນໄວອັນຄວນຈາກຜູ້ຕາງໜ້າອົງການຊ່ວຍເຫຼືອເດັກສາກົນ.

ບັນດາຫົວຂໍ້ທີ່ນໍາມາສະເໜີຄັ້ງນີ້ ລ້ວນແຕ່ເປັນປະໂຫຍດແລະບົດຮຽນອັນດີໃຫ້ແກ່ເອື້ອຍນ້ອງແມ່ຍິງເພື່ອນໍາໄປໝູນໃຊ້ໃນໜ້າທີ່ວຽກງານແລະການດໍາລົງຊີວິດໃນສັງຄົມລວມເຖິງການພັດທະນາຊີວິດການເປັນຢູ່ຂອງຕົນເອງກໍຄືຄອບຄົວໃຫ້ນັບມື້ນັບດີຂຶ້ນ.

ຄຽງຄູ່ກັນນີ້ຍັງໄດ້ຈັດກິດຈະກໍາກວດສຸຂະພາບຕາ, ກວດມວນກະດູກ, ກວດໂພຊະນາການສໍາລັບແມ່ຍິງເພື່ອສ້າງເງື່ອນໄຂໃຫ້ເຂົາເຈົ້າໄດ້ມີໂອກາດເອົາໃຈໃສ່ ແລະ ໃຫ້ຄວາມສໍາ ຄັນຕໍ່ການຮັກສາສຸຂະພາບຂອງຕົນເອງແລະຄອບຄົວ.ນອກນີ້, ຍັງມີກິດຈະກໍາວາງສະແດງສິນຄ້າກໍຄືຜະລິດຕະພັນທີ່ມາຈາກສີໄມ້ລາຍມືແລະຫົວຄິດປະດິດສ້າງຂອງແມ່ຍິງລາວບັນດາເຜົ່າ, ກິດຈະກໍາຖາມ-ຕອບຄວາມຮູ້ຮອບຕົວກ່ຽວກັບວັນແມ່ຍິງສາກົນ ແລະ ສະຫະພັນແມ່ ຍິງລາວ, ມີການຫຼິ້ນກີລາ, ສະແດງສິລະປະວັນນະຄະດີແບບມວນຊົນແລະການສາຍຟີ້ມວິດີໂອ ປະມວນຮູບພາບທີ່ຍົກໃຫ້ເຫັນການເຄື່ອນໄຫວພົ້ນເດັ່ນຂອງສະຫະພັນແມ່ຍິງລາວໃນເວທີສາກົນກໍຄືວຽກງານພົວພັນຮ່ວມມືກັບຕ່າງປະເທດເພື່ອຊຸກຍູ້ສົ່ງເສີມພັນທະໜ້າທີ່ໃນການປະຕິບັດສົນທິສັນຍາ, ຖະແຫຼງການແລະເປົ້າໝາຍການພັດທະນາແບບຍືນຍົງຫຼືSDGSຊຶ່ງລາວເຮົາເປັນພາຄີແນໃສ່ເຊີດຊູບົດບາດຂອງແມ່ຍິງໃນການເຊື່ອມໂຍງເຂົ້າກັບອາຊຽນ, ພາກພື້ນແລະສາກົນ.

ໂດຍ: ອິນດາວອນ

 

Comments