Senglao content (728×90)
Senglao content (728×90)

ສວນນໍ້າດົງ ແຫຼ່ງທ່ອງທ່ຽວທາງທໍາມະຊາດແບບຄົບວົງຈອນ.

ສະບາຍດີ ບັນດາທ່ານຜູ້ອ່ານທີ່ຮັກແພງທັງຫຼາຍ ມື້ນີ້, ທີມງານວາລະສານທາເກັດ ຈະຂໍມາແນະນໍາໃຫ້ບັນດາທ່ານຜູ້ອ່ານ ໄດ້ຮູ້ຈັກກັບສະຖານທ່ອງທ່ຽວອີກແຫ່ງໜຶ່ງຂອງແຂວງ ຫຼວງພະບາງ ເຊິ່ງສະຖານທີ່ແຫ່ງນັ້ນກໍຄື ສວນນໍ້າດົງ.

ແຂວງຫຼວງພະບາງ ເປັນແຂວງທີ່ມີຊື່ສຽງໃນດ້ານສະຖານທີ່ທ່ອງທ່ຽວ ບໍ່ວ່າຈະເປັນດ້ານຮີດຄອງປະເພນີ-ວັດທະນະທໍາ ທີ່ໄດ້ສືບທອດຮັກສາຕໍ່ກັນມາ ແລະ ທໍາມະຊາດທີ່ຍັງມີຄວາມອຸດົມສົມບູນ-ສວຍງາມເຊັ່ນ: ນໍ້າຕົກຕາດກວາງຊີ, ຕາດແສ້, ນອກນີ້ຍັງມີ ຖໍ້າຕິ່ງ, ວັດຊຽງທອງ, ພະລາຊະວັງເກົ່າ ແລະ ສະຖານທີ່ອື່ນໆອີກຫຼາຍແຫ່ງ ທີ່ເປັນສິ່ງດຶງດູດໃຫ້ນັກທ່ອງທ່ຽວ ທັງພາຍໃນ ແລະ ຕ່າງປະເທດໃຫ້ມາທ່ຽວ ທີ່ແຂວງຫຼວງພະບາງບໍ່ຂາດໄລຍະ.

ສວນນໍ້າດົງ (Nam dong Park) ຕັ້ງຢູ່ບ້ານ ຊຽງມວກ ເມືອງຫຼວງພະບາງ ແຂວງຫຼວງພະບາງ ເປັນແຫຼ່ງທ່ອງທ່ຽວໃນຮູບແບບການອະນຸຮັກທໍາມະຊາດ ແບບຄົບວົງຈອນ ເປັນດິນແດນທີ່ອຸດົມສົມບູນ ຫ່າງຈາກຕົວເມືອງຫຼວງພະບາງພຽງ 10 ກິໂລແມັດ. ສວນນໍ້າດົງ (Nam dong Park) ເປັນຊື່ເອີ້ນທີ່ໄດ້ມາຈາກສາຍນໍ້າ ທີ່ໄຫຼຜ່ານເຂົ້າມາໃນດິນແດນແຫ່ງນີ້ກໍຄື: ສາຍນໍ້າດົງ ທີ່ໄຫຼຜ່ານສາຍພູ  ຈຶ່ງເຮັດໃຫ້ປ່າແຫ່ງນີ້ມີຄວາມຂຽວງາມ ແລະ ຊຸ່ມເຢັນຕະຫຼອດປີ. ນອກນັ້ນ ສວນນໍ້າດົງ ແຫ່ງນີ້ຍັງນໍາເອົາວິຖີຊີວິດຂອງປະຊາຊົນເຂດບ້ານ ໃຫ້ກາຍມາເປັນກິດຈະກໍາເຊັ່ນ: ກິດຈະກໍາການແຕ່ງກິນ ນັກທ່ອງທ່ຽວສາມາດເກັບຜັກປອດສານພິດ ຢູ່ພາຍໃນສວນໄປແຕ່ງກິນເອງໄດ້, ກິດຈະກໍາຜະລິດເຈ້ຍສາດ້ວຍຕົນເອງ, ກິດຈະກໍາຕົ້ມເຫຼົ້າຂາວ ແລະ ທ່ານໃດທີ່ມັກຄວາມທ້າທາຍຍັງມີກິດຈະກໍາ ການຈ່ອງສະລິງ, ຍ່າງປ່າ, ຊົມບ້ານຕົວແບບຊົນເຜົ່າ, ຫຼິ້ນນໍ້າຕົກ ແລະ ຍັງມີກິດຈະກໍາ ຕັ້ງແຄັມ ໃນເວລາກາງຄືນເພື່ອນອນຊົມດາວທ່າມກາງສາຍນໍ້າ ແລະ ທໍາມະຊາດອ້ອມໜ່ວຍພູ.

ນອກຈາກນີ້ ຍັງມີສວນສັດຂະໜາດນ້ອຍ (Mini Zoo), ສວນລ້ຽງເຜິ້ງ, ເຮືອນຕົ້ນໄມ້ ແລະ ສວນຜັກປອດສານຜິດ. ຢູ່ສວນນໍ້າດົງແຫ່ງນີ້ຍັງມີ ຮ້ານອາຫານ, ຮ້ານກາເຟ ທີ່ຕັ້ງຢູ່ໃຈກາງສາຍນໍ້າດົງ ແລະ ໃນສ່ວນນີ້ແມ່ນນັກທ່ອງທ່ຽວໃຫ້ຄວາມສົນໃຈຫຼາຍ ນອກຈາກຈະໄດ້ຊີມຣົດຊາດຂອງກາເຟ ທີ່ຂຶ້ນຊື່ຂອງແຂວງຫຼວງພະບາງແລ້ວ ຍັງໄດ້ນັ່ງດື່ມກາເຟ ຢູ່ທ່າມກາງສາຍນໍ້າໄຫຼ ໃຫ້ບັນຍາກາດທີ່ສົດຊື່ນ ຮັບຮອງໄດ້ເລີຍວ່າແຕກຕ່າງຈາກທຸກບ່ອນທີ່ທ່ານເຄີຍໄປສໍາຜັດ.

ທ່ານໃດຢາກໄປທ່ຽວພັກຜ່ອນໃນບັນຍາກາດທໍາມະຊາດອັນຊຸ່ມເຢັນຕ້ອງໄປສວນນໍ້າດົງແຫ່ງນີ້ ສໍາລັບຄ່າເຂົ້າຊົມ 20.000 ກີບ/ຄົນ (ລາຄາດຽວກັນທັງຄົນລາວ ແລະ ຕ່າງປະເທດ) ເຊິ່ງປັດຈຸບັນນີ້ການເດີນທາງໄປແຂວງຫຼວງພະບາງນັ້ນ ກໍສະດວກສະບາຍບໍ່ວ່າຈະເປັນທາງລົດ ຫຼື ທາງຍົນ ເຊິ່ງເພິ່ນເປີດໃຫ້ບໍລິການທຸກມື້ຕັ້ງແຕ່ເວລາ 9 ໂມງ ຫາ 17 ໂມງ. ຂໍ້ມູນລະອຽດທ່ານສາມາດເຂົ້າໄປເບິ່ງໄດ້ທີ່  www.Namhdong.com

Comments