Senglao content (728×90)
Senglao content (728×90)

ຈຳປາສັກພົບພະນັກງານລັດ 33 ຄົນມີພຶດຕິກຳສໍ້ລາດບັງຫຼວງ

ປັດຈຸບັນພາກລັດກວດກາເຄັ່ງຄັດຂຶ້ນ ພະນັກງານລັດທີ່ມີພືດຕິກຳສໍ້ລາດບັງຫຼວງບໍ່ໄດ້ລອຍນວນດົນ ໃຜເຮັດຜິດຕ້ອງຖືກລົງວິໄນ ແລະຮັບໂທດຕາມກົດໝາຍ ແຕ່ໜ້າເສຍດາຍພຽງບໍ່ມີການເປີດເຜີຍໜ້າຕາໃຫ້ປະຊາຊົນເຫັນ ເພື່ອເພີ່ມໂທດຈາກສັງຄົມອີກທາງໜຶ່ງ!!!ແຕ່ກໍ່ດີກວ່າບໍ່ມີການປັບໃໝໃສ່ໂທດຫຍັງ.

ທ່ານ ຄຳໃບ ເພັດມີໄຊ ຮອງປະທານຄະນະກວດກາພັກແຂວງ ຮອງຫົວໜ້າພະແນກກວດກາລັດແຂວງຈຳປາສັກ ໄດ້ລາຍງານຕໍ່ກອງປະຊຸມວຽກງານກວດກາທົ່ວແຂວງປະຈຳປີ 2017 ຊຶ່ງຈັດຂຶ້ນໃນທ້າຍເດືອນເມສາຜ່ານມານີ້ໃຫ້ຮູ້ວ່າ: ຄະນະກຳມະການກວດກາພັກ ພະແນກກວດກາລັດແຂວງ ແລະຄະນະກວດກາແຕ່ລະຂັ້ນ ໄດ້ປະຕິບັດພາລະບົດບາດ,ໜ້າທີ່,ສິດຂອງຕົນໃນການກວດກາການປະຕິບັດກົດລະບຽບຂອງພັກ, ຕິດຕາມກວດກາກໍ່ສ້າງໜ່ວຍພັກແຂງ – ຮູ້ນຳພາຮອບດ້ານ, ກວດກາການບໍລິຫານລັດ ການປະຕິບັດແຜນພັດທະນາເສດຖະກິດ-ສັງຄົມ ປະກົດວ່າ ພົບພິລຸດບາງຢ່າງເປັນຕົ້ນພະນັກງານລັດທີ່ມີພືດຕິກຳສໍ້ລາດບັງຫຼວງ.

 

ຜ່ານຈາກການກວດກາອັນພົ້ນເດັ່ນທົ່ວແຂວງ ພົບເຫັນພະນັກງານມີພືດຕິກຳສໍ້ລາດບັງຫຼວງຈຳນວນ 6 ເລື່ອງ ມີພະນັກງານພົວພັນທັງໝົດ 33 ຄົນເປັນຕົ້ນແມ່ນການສວຍໃຊ້ໜ້າທີ່ເກີນຂອບເຂດ, ປອມແປງເອກະສານ ແລະນຳໃຊ້ເອກະສານປອມຍັກຍອກຊັບສິນຂອງລັດ, ລວມໝູ່ ເຮັດໃຫ້ຊັບສິນຂອງລັດເສຍຫາຍຈຳນວນ 3,62 ຕື້ກວ່າກີບ ໃນນີ້ແມ່ນບໍ່ລວມສະກຸນເງິນໄທ 59.000 ບາດ ແລະເງິນໂດລາສະຫາລັດ 9 ແສນກວ່າໂດລາ.

ປັດຈຸບັນໄດ້ນຳຜູ້ກະທຳຜິດດຳເນີນຄະດີຕາມຂັ້ນຕອນຂອງກົດໝາຍແລ້ວ 3 ເລື່ອງ, ຍັງ 3 ເລື່ອງ ສາມາດເກັບກູ້ຊັບສິນຄືນໄດ້ ເງິນກີບ 815.000.000 ກີບ, ແລະ ເງິນບາດ 59.000 ບາດ.

ອີກທາງໜຶ່ງກໍໄດ້ດຳເນີນການຂຶ້ນທະບຽນແຈ້ງຊັບສິນຂອງພະນັກງານທຸກຂັ້ນເປັນຮອບທີ 2 ຈາກນີ້ກໍໄດ້ເອົາໃຈໃສ່ກວດກາ ການລົງທຶນຂອງລັດຢູ່ແຂວງຈຳປາສັກທັງໝົດມີ 260 ໂຄງການ, ກວດກາ ການປະຕິບັດຄຳສັ່ງ ເລກທີ 15 ຂອງນາຍົກລັດຖະມົນຕີສາມາດຢຶດໄມ້ໄດ້ທັງໝົດ 8 ພັນກວ່າແມັດກ້ອນ ແລະ 220 ກິໂລ, ໄດ້ປະມູນຂາຍແລ້ວ 3.700 ກວ່າແມັດກ້ອນມູນຄ່າ 6 ແສນກວ່າໂດລາ ເປັນເງິນກີບ 7 ຕື້ກ່ວາກີບ.

ຂ່າວ;ພາບ: ເກດສະຫນາ

ຂອບໃຈຂ່າວຈາກ: Lao National Radio

Comments