Senglao content (728×90)
Senglao content (728×90)

ດິນແດນ 4.000 ຂຸມ ສິ່ງທີ່ໜ້າອັດສະຈັນໃນປະເທດລາວ

ປີນີ້, ເປັນປີທ່ອງທ່ຽວລາວ ຫຼາຍໆທ່ານອາດຈະມີແຜນໄປທ່ຽວ ພາກເໜືອ – ພາກໃຕ້ ຂອງລາວ ເພື່ອສະໜັບສະໜູນການທ່ອງທ່ຽວເຮົາເອງ, ມື້ນີ້,​ທາງເວັບໄຊທາເກັດ ກໍຂໍແນະນຳສະຖານທີ່ທ່ອວທ່ຽວທີ່ເຫັນວ່າ ງາມ ອີຫລີ ແລະ ມີຫຼາຍຄົນຍັງບໍ່ທັນໄດ້ຮູ້ໄດ້ເຫັນ, ແຕ່ຖ້າໃຜໄດ້ໄປທ່ຽວທາງພາກໃຕ້ ກໍຢ່າລືມໄປແຂວງສາລະວັນແນ່ເດີ້!  ເພາະສະຖານທີ່ທ່ອງທ່ຽວທີ່ເຮົມາແນະນຳໃຫ້ຮູ້ຈັກນີ້ກໍຄື “ເຂດຊາຍແດນ 4000 ຂຸມ”

ສະຖານທີ່ທ່ອງທ່ຽວ 4.000 ຂຸມ ເປັນສະຖານທີ່ ທ່ອງທ່ຽວທີ່ມີຄວາມໂດດ ເດັ່ນ ແລະ ໜ້າອັດສະຈັນ ກຳເນີດເກີດຂຶ້ນຈາກທຳມະຊາດ ເຊິ່ງສະຖານທີ່ດັ່ງກ່າວ ແມ່ນກຳລັງເປັນທີ່ສົນໃຈ ຂອງນັກທ່ອງທ່ຽວທັງພາຍໃນ ແລະ ຕ່າງປະເທດ,  ເຊິ່ງລະດູການຂອງການທ່ອງທ່ຽວ 4.000 ຂຸມ ແມ່ນຈະເລາະລຽບໄດ້ ແມ່ນເລີ່ມມາແຕ່ເດືອນມັງກອນ ໄປຈົນ ເຖິງ ເດືອນພຶດສະພາຂອງ ທຸກໆປີ ເພາະສະຖານທີ່ດັ່ງກ່າວ ແມ່ນຢູ່ຕາມລໍາແມ່ນໍ້າຂອງທີ່ເກີດຈາກ ການກັດ ເຊາະຂອງແມ່ນໍ້າຂອງເຮັດ ໃຫ້ເກີດເປັນປະຕິມາກໍາທີ່ ໜ້າມະຫັດສະຈັນ, ໂດຍມີບັນດາກ້ອນຫີນຂະໜາດ ນ້ອຍ- ໃຫຍ່ ທີ່ໄດ້ຖືກສາຍນໍ້າກັດເຊາະມາເປັນເວລາຫຼາຍປີເຮັດໃຫ້ກາຍເປັນຮູບແບບຕ່າງໆນໍາມາໃຫ້ເກີດຄວາມສວຍສົດງົດງາມ ແລະ ແປກຕາແປກໃຈ ທີ່ທຳມະຊາດ ໄດ້ສ້າງຂຶ້ນມາ ຢ່າງມະຫັດ ສະຈັນ.

ສະຖານທີ່ທ່ອງທ່ຽວ 4.000 ຂຸມ ແມ່ນມີມາຫຼາຍຮ້ອຍປີແລ້ວ, ແຕ່ໄລຍະຜ່ານມາບໍ່ຄ່ອຍມີໃຜສົນໃຈພໍປານໃດ ແລະ ບໍ່ໄດ້ຮັບການພັດທະນາ.  ແຕ່ມາໃນໄລຍະ 10 ປີຫຼັງຜ່ານມາ ນີ້ ວຽກງານການທ່ອງທ່ຽວ ໄດ້ມີການເຕີບໃຫຍ່ຂະຫຍາຍຕົວຂຶ້ນຈຶ່ງໄດ້ກໍານົດເອົາຈຸດດັ່ງກ່າວ ເປັນອີກໜຶ່ງສະຖານທີ່ທ່ອງທ່ຽວ ທີ່ມີຄວາມໜ້າສົນໃຈ ຂອງເມືອງລະຄອນເພັງ, ແຂວງສາລະວັນ.

ສໍາລັບທ່ານໃດທີ່ມີ ຄວາມຕ້ອງການໄປທ່ຽວ ຊົມສະຖານທີ່ທ່ອງທ່ຽວ 4.000 ຂຸມໃນເວລາທ່ອງທ່ຽວທີ່ເໝາະສົມທີ່ສຸດ ຄືຕອນເຊົ້າ ແລະ ຕອນແລງໆ ເພື່ອເບິ່ງຕາເວັນຂື້ນ ຂອບຟ້າຍາມເຊົ້າ ແລະ ຕາເວັນລົງລັບຂອບຟ້າຍາມແລງ ບອກໄດ້ເລີຍວ່າເປັນໄລຍະ ທີ່ມີຄວາມງົດງາມທີ່ສຸດ. ນອກຈາກນີ້, ຕາມຈຸດຕ່າງໆ ຍັງສາມາດເກັບພາບທີ່ມີ ຄວາມໂດດເດັ່ນ ແລະ ງົດງາມໄດ້ອີກ ເຊິ່ງທ່ານຈະບໍ່ ຜິດຫວັງແນ່ນອນ ເມື່ອທ່ານ ໄດ້ສໍາຜັດດ້ວຍຕົວເອງ.

ນັກທ່ອງທ່ຽວສາມາດເດີນທາງໄປໄດ້ທີ່ບ້ານທ່າຄັນ ຊຸມຊົວ ເມືອງລະຄອນເພັງ ແຂວງສາລະວັນ ຫຼື ພົວພັນສອບຖາມໄປຍັງຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງລະ ຄອນເພັງ ຈະມີພະນັກງານ- ວິຊາການ ປະຈໍາທ້ອງຖິ່ນ ເປັນຜູ້ປະສານງານ ແລະ ນຳພາທ່ານ ໄປເຖິງສະຖານ ທີ່ ທ່ອງທ່ຽວຢ່າງສະດວກ ສະບາຍ.

ພາບ-ບົດຄວາມ : ໜັງສືພິມ ລາວພັດທະນາ 

Comments