Senglao content (728×90)
Senglao content (728×90)

ແຈ້ງເຕືອນ! ໂຮງງານຂ້າສັດໃຫ້ປັບປຸງມາດຕະຖານ ຝ່າຝືນອາດຖືກປິດທັນທີ

ພະ​ແນ​ກອຸດສາຫະກຳ ​ແລະ ການ​ຄ້າ ນະຄອນຫຼວງ​ວຽງຈັນ, ​ໄດ້​​ດຳ​ເນີນ​ກອງ​ປະຊຸມ​ປຶກສາຫາລື ໃນ​ວັນ​ທີ 10 ພຶດສະພາ ທີ່ຜ່ານມາ,  ​ເພື່ອ​ກະກຽມດຳ​ເນີນປັບປຸງ ບັນດາ​ໂຮງງານ​ຂ້າ​ສັດ ​ແລະ ບ່ອນ​ຂ້າ​ສັດ​ຍ່ອຍ​,  ພາຍຫຼັງ​​ໄດ້​ລົງ​ກວດກາ​ພົບວ່າ​  ມີ​ໂຮງງານ​ຂ້າ​ສັດ​ຫຼາຍ​ແຫ່ງ​  ບໍ່ມີ​ຄຸນ​ນະພາ​ບ ​ແລະ ບໍ່​ໄດ້ມາດຕະຖານ,  ທັງບໍ່​ຮັບປະກັນ​ສຸ​ຂະ​ນາ​ໄມ,  ​ເຊິ່ງ​ເປັນ​ອັນຕະລາຍ​ແກ່​ຜູ້​ບໍລິ​ໂພ​ກ.  ຢ່າງ​ໃດ​ກໍ​ຕາມ ​ເຈົ້າໜ້າທີ່​ ໄດ້ມີ​ການ​ ແນະນຳ​ໃຫ້​ບັນດາ​ໂຮງງານ​ດັ່ງກ່າວ​  ປັບປຸງ​ມາດຕະຖານ​ໃຫ້​ດີ​ຂຶ້ນ,  ໂດຍ​ໃຫ້​ເວລາ 3 ​ເດືອນ, ຖ້າຫາກ​ຍັງ​ຝ່າຝືນ  ​ແມ່ນ​ຈະ​ຖືກສັ່ງ​ປິດ​ທັນທີ,  ​ໂດຍອີງ​ຕາມ​ຄຳ​ສັ່ງ​ເຈົ້າ​ຄອງ​ນະຄອນຫຼວງ​ວຽງຈັນ.

ທ່ານ ນາງ ວັນ​ມະນີ ພິມ​ມະ​ສານ ຮອງ​ຫົວ​ໜ້າ ພະ​ແນ​ກອຸດສາຫະກຳ ​ແລະ ການ​ຄ້າ ນະຄອນຫຼວງ​ວຽງຈັນ,  ​ເປີດ​ເຜີຍ​ຕໍ່ກອງ​ປະຊຸມ​ວ່າ:  ປັດຈຸບັນ ​ທົ່ວ​ນະ​ຄອນ​ຫຼວງ​ວຽງ​ຈັນ ມີ​ໂຮງງານ​ຂ້າ​ສັດ  ​ແລະ ບ່ອນ​ຂ້າ​ສັດ​ຍ່ອຍ ທີ່​ໄດ້​ຮັບ​ອະນຸຍາດ ດຳ​ເນີນ​ກິດຈະການ​ທັງ​ໝົດ​ 28 ​​ແຫ່ງ,  ອັດຕາ​ການ​ຂ້າ​ສັດ​ຕໍ່​ວັນ​ສະ​ເລ່ຍ ໝູ 560 ​ໂຕ,  ງົວ, ຄວາຍ 58 ​ໂຕ. ​ໃນ​ນີ້, ມີ​ໂຮງງານຕັ້ງ​ຢູ່  ​ເມືອງ​ຈັນທະ​ບູລີ 1 ​​ແຫ່ງ, ສີ​ໂຄດ​ຕະບອງ 3 ​ແຫ່ງ, ​ໄຊ​ເສດ​ດຖາ 1 ​ແຫ່ງ, ນາ​ຊາຍ​ທອງ 3 ​ແຫ່ງ, ​ໄຊ​ທານີ 8 ​ແຫ່ງ, ຫາດ​ຊາຍ​ຟອງ, ​ເມືອງສັງ​ທອງ ​ແລະ ​ເມືອງປາກງື່ມ ​ເມືອງ​ລະ 4 ​ແຫ່ງ. ຜ່ານ​ການ​ລົງ​ຕິດຕາມ​ກວດກາ​​ ເຫັນ​ວ່າ ການ​ດຳ​ເນີນ​ກິດຈະການ​ໂຮງຂ້າ​ສັດ  ​ແລະ ບ່ອນ​ຂາຍ​ສັດ​ຍ່ອຍ​ ຈຳນວນ 13 ​​ແຫ່ງ ແມ່ນ​ບໍ່​ໄດ້​ຕາມ​ມາດຕະຖານ​ໂຮງງານ​ຂ້າ​ສັດ ​ ​ແລະ ຂໍ້ຕົກລົງ ​ຂອງ​ທ່ານເຈົ້າ​ຄອງນະຄອນຫຼວງ ເຊັ່ນ:  ມາດຕະຖານ​ດ້ານ​ອາຄານ​ໂຮ​ງງານ, ເຄື່ອງ​ຈັກ, ມາດຕະຖານ​ດ້ານ​ຄວາມ​ປອດ​ໄພ  ສຸຂະ​ອະນາ​ໄມ​ໂຮງງານ​ ບໍ່​ມີ​ຫ້ອງການ,  ບໍ່ມີ​ບ່ອນ​ພັກ​ສັດ, ​ເປັນ​ອາຄານ​ເປີດ  ການຈັດ​ສັນ​ພື້ນ​ທີ່​ບໍ່​ເປັນ​ລະບຽບ,  ບໍ່ຮັບປະກັນຄວາມ​ສະອາດ,  ບໍ່​ມີ​ສາງ​ເຢັນ, ພາ​ຊະນະ​ບັນຈຸ​ຊີ້​ນບໍ່​ໄດ້​ມາດຕະຖານ,  ບໍ່​ມີ​ເຄື່ອງ​ຍົກ​ນ້ຳໜັກ​ເພື່ອ​ຍົກ​ຊາກ​ສັດ   ​ແລະ ບໍ່​ມີ​ໝາກລ໋ອກສະຫວັນ​ ເພື່ອ​ລຳລຽງ​ຊາກ​ສັດ  ​ໄປ​ຕາມ​ຂັ້ນ​ຕອນ​ການ​ຜະລິດ. ພ້ອມ​ນັ້ນ, ຍັງບໍ່​ມີ​ລະບົບ​ເຕືອນ​ໄພ,  ບໍ່​ມີ​ລະບົບ​ປ້ອງ​ກັນອັນຕະລາຍ​  ຈາກ​ເຄື່ອງ​ຈັກ, ອຸປະກອນ​ປ້ອງ​ກັນ​ຝຸ່ນ, ກິ່ນ ​ແລະ ຕູ້​ຢາ​ສຸກ​ເສີນ​ປະຈຳ​ໂຮງງານ.

ສະນັ້ນ, ທາງ ພະແນກອຸດສາຫະກຳ ແລະ ການຄ້າ ນະຄອນຫຼວງ ຈຶ່ງຮຽກຮ້ອງໃຫ້ບັນດາ 13 ໂຮງງານຂ້າສັດດັ່ງດ່າວນີ້ ຈົ່ງມີກນປັບປຸງຄຸນນະພາບ ບໍ່ດັ່ງນັ້ນ ຈະຖືກສັ່ງໃຫ້ປິດກິດຈະການ.

 

Comments