Senglao content (728×90)
Senglao content (728×90)

ນາຍົກລັດຖະມົນຕີ ເນັ້ນແຂວງບໍລິຄໍາໄຊແກ້ໄຂປະກົດການຫຍໍ້ທໍ້ 4 ເຖື່ອນ

​ໃນ​ໂອກາດ​ເຄື່ອນ​ໄຫວ ​ເຮັດ​ວຽກ​ຢູ່​ແຂວງ​ບໍລິ​ຄຳ​ໄຊ ໃນທ້າຍອາທິດ​ຜ່ານ​ມາ , ທ່ານ ທອງລຸນ ສີສຸລິດ ນາຍົກລັດຖະມົນຕີ  ​ໄດ້ໂອ້ລົມ ​ແລະ ​ໃຫ້​ທິດ​ຊີ້​ນຳ  ​ແກ່ຄະນະພັກ, ຄະນະນໍາ, ພະນັກງານພາຍໃນແຂວງບໍລິຄໍາໄຊ ຫຼາຍ​ບັນຫາ​ສຳ​ຄັນ​ ຕໍ່​ການ​ພັດທະນາ​ເສດຖະກິດ -ສັງຄົມ​ ພາຍ​ໃນ​ແຂວງ. ​ໃນ​ນັ້ນສິ່ງສໍາຄັນ  ແມ່ນໃຫ້ເອົາໃຈໃສ່ແກ້ໄຂຢ່າງເດັດຂາດ  ຕໍ່ກັບປະກົດການຫຍໍ້ທໍ້ 4 ເຖື່ອນ  (ຄົນ​ເຖື່ອນ, ລົດ​ເຖື່ອນ, ອາວຸດ​ເຖື່ອນ ແລະ ສິນຄ້າ​ເຖື່ອນ)  ທີ່ແຂວງ ໄດ້ວາງອອກ.

ພ້ອມ​​ນີ້, ທ່ານ​ນາຍົກລັດຖະມົນຕີ  ຍັງ​ໄດ້​ຊີ້​ນຳໃຫ້ສືບຕໍ່ເອົາໃຈໃສ່​ຄຸ້ມຄອງ ​ການຈັດ​ເກັບ​ລາຍ​ຮັບໃຫ້​ຖືກຕ້ອງ​ຄົບ​ຖ້ວນ  ​ສິ່ງສໍາຄັນ ແມ່ນໃຫ້ເອົາເຂົ້າສູ່ບັນດາກົນໄກ,  ລະບຽບການ ແລະ ຫັນໄປສູ່ຄວາມທັນສະໄໝ  ເພື່ອຮັບປະກັນໃຫ້ມີຄວາມໂປ່ງໄສ  ແລະ ຊັດເຈນ ຄຽງຄູ່ກັບການຄຸ້ມຄອງ ນໍາໃຊ້ງົບປະມານລັດ ຢ່າງປະຢັດມັດທະຍັດ  ແລະ ມີປະສິດທິຜົນສູງ;  ສືບຕໍ່ລົງຊຸກຍູ້ວຽກງານກໍ່ສ້າງຮາກການ ການເມືອງ ຕາມ 4 ເນື້ອໃນ 4 ຄາດໝາຍ  ແລະ ປະຕິບັດວຽກງານ 3 ສ້າງຢູ່ພາຍໃນ ແຂວງ ໃຫ້ເຂົ້າສູ່ລວງເລິກ ແນໃສ່ລຶບລ້າງ ຄວາມທຸກຍາກຂອງປະຊາຊົນ.

ສໍາລັບ ການພັດທະນາພື້ນຖານໂຄງລ່າງ  ​ໂດຍ​ສະເພາະ ການພັດທະນາກໍ່ສ້າງ ເສັ້ນທາງ ຢູ່ພາຍໃນແຂວງ  ເພື່ອເປັນທ່າແຮງນໍາໃຊ້ ໃຫ້ແກ່ການ ພັດທະນາເສດຖະກິດ-ສັງຄົມ ແມ່ນມອບໃຫ້ແຂວງ  ສົມທົບກັບພາກສ່ວນທີ່ກ່ຽວຂ້ອງ  ສຶກສາຄົ້ນຄວ້າ ແລະ ມີແຜນລະອຽດ  ວ່າຈະເຮັດແນວໃດ ແລະ ບ່ອນໃດ ທີ່ມີຄວາມຈໍາເປັນແທ້ ໃນເງື່ອນໄຂປະຈຸບັນ  ແລະ ຕໍ່ໜ້າ ທີ່ປະເທດເຮົາ ໄດ້ມີແຜນກໍ່ສ້າງ ເສັ້ນທາງຄົມມະນາຄົມ ເພື່ອຈອດ ແລະ ເຊື່ອມໂຍງກັບ  ບັນດາປະເທດເພື່ອນບ້ານ. ທັງນີ້, ກໍເພື່ອເປັນການ ປະຢັດມັດທະຢັດ ງົບປະມານຂອງລັດ  ແລະ ຫຼີກລ້ຽງການໃຊ້ຈ່າຍຟູມເຟືອຍ.  ພ້ອມກັນນັ້ນ ກໍ່ຕ້ອງສ້າງ ສະພາບແວດລ້ອມ ແລະ ເງື່ອນໄຂ ອຳນວຍຄວາມສະດວກທີ່ດີ  ເພື່ອຍາດແຍ່ງເອົາການລົງທຶນ ທັງພາຍໃນ ແລະ ຕ່າງປະເທດ ໃຫ້ຫຼາຍຂຶ້ນ.

ໃນໂອກາດເດີນທາງ ໄປເຄື່ອນໄຫວເຮັດວຽກ ຢູ່ແຂວງບໍລິຄໍາໄຊ  ຄັ້ງນີ້, ທ່ານນາຍົກລັດຖະມົນຕີ ​ແລະ ຄະນະ  ຍັງໄດ້ເຮັດວຽກຮ່ວມກັບ ບໍລິສັດ  ບໍ່ຄໍາ ຄໍາເກີດ ແສນອຸດົມ, ໄປວາງພວງມາລາ ຕໍ່ໜ້າຮູບປັ້ນ ທ່ານ ສີສົມພອນ ລໍວັນໄຊ  ແລະ ປູກຕົ້ນໄມ້ ເພື່ອເປັນທີ່ລະນຶກ  ຢູ່ສວນສາທາລະນະ ຮູບປັ້ນທ່ານ ສີສົມພອນ ລໍວັນໄຊ  ຕື່ມອີກ.

ທ່ານນາຍົກລັດຖະມົນຕີແຫ່ງ ສປປ ລາວ ເຄື່ອນໃຫວວຽກງານຢູ່ເເຂວງ ບໍລິຄຳໄຊ

ທ່ານນາຍົກລັດຖະມົນຕີແຫ່ງ ສປປ ລາວ ເຄື່ອນໃຫວວຽກງານຢູ່ເເຂວງ ບໍລິຄຳໄຊ

โพสต์โดย ສະຖານີ ວິທະຍຸ-ໂທລະພາບ ແຂວງບໍລິຄຳໄຊ เมื่อ 12 พฤษภาคม 2018

ທີ່ມາ: ຂ່າວສານປະເທດລາວ

ສະຖານີວິທະຍຸ-ໂທລະພາບແຂວງບໍລິຄຳໄຊ

Comments