Senglao content (728×90)
Senglao content (728×90)

ກຸງສີ ລິດຊິ້ງ ຈັດກິດຈະກຳສະເຫຼີມສະຫຼອງວັນເດັກນ້ອຍສາກົນ

ໄລຍະ 2 – 3 ມື້ນີ້, ຢູ່ບ້ານເຮົາກໍຈະຄຶກຄື້ນສະເຫຼີມສະຫຼອງງານວັນເດັກນ້ອນສາກົນ ແລະ ວັນປູກຕົ້ນໄມ້ ແຫ່ງຊາດ ວັນທີ 1 ມິຖຸນາ ທີ່ຈະມາເຖິງໃນມື້ອື່ນນີ້. ຫຼາຍໆພາກສ່ວນກໍຈະມີການຈັດກິດຈະກຳໃຫ້ກັບເດັກນ້ອຍ ໄປທ່ອງທ່ຽວ, ມ່ວນຊື່ນ, ໃຫ້ຄວາມຮູ້ ແລະ  ແຈກຂອງຂວັນລາງວັນຕ່າງໆ.

ແລະ ທາງບໍລິສັດ ກຸງສີ ລິດຊິ້ງ ຈຳກັດ ເພິ່ນກໍໄດ້ເຫັນຄວາມສຳຄັນຂອງເດັກນ້ອຍ ຜູ້ທີ່ເປັນອະນາຄົດຂອງຊາດ  ຈຶ່ງໄດ້ຈັດກິດຈະກຳສະເຫຼີມສະຫຼອງ ວັນເດັກນ້ອຍສາກົນຂຶ້ນ  ຕອນເຊົ້າມື້ນີ້ ວັນທີ 31 ພຶດສະພາ 2018 ຢູ່ທີ່ໂຮງຮູບເງົາ ເມເຈີ ຊີນີແພັກລາວ ຊັ້ນ 4 ຂອງສູນການຄ້າວຽງຈັນເຊັນເຕີ້, ໂດຍໄດ້ນຳພານ້ອງໆຈາກ ໂຮງຮຽນປະຖົມ ໂພນທັນ ຈຳນວນທັງ 100 ກວ່າຄົນ ມາຊົມຮູບເງົາຟຣີ ແລະ ຍັງໄດ້ມອບອຸປະກອນການສຶກສາເຊັ່ນ: ຖົງ, ປຶ້ມ, ບິກ, ສໍ້…. ຍັງບໍ່ພໍເທົ່ານັ້ນ, ທາງ ກຸງສີ ລິດຊິ້ງ ຍັງໄດ້ມີກິດຈະກຳ ໃຫ້ຄວາມຮູ້ ພື້ນຖານ ທາງດ້ານການເງິນໃຫ້ກັບເດັກນ້ອຍອີກ ເພາະເຫັນວ່າ ການໃຫ້ຄວາມຮູ້ທາງດ້ານການເງິນ ຕັ້ງແຕ່ເດັກນ້ອຍນີ້ ແມ່ນຈະມີຜົນໃຫ້ເດັກນ້ອຍຮູ້ຈັກປະຢັດ ແລະ ສາມາດເກັບທ້ອນເງິນຕັ້ງແຕ່ນ້ອຍ ກໍຈະເປັນຜົນດີຕໍ່ອະນາຄົດຂອງເດັກ.  ນອກນີ້, ກໍຍັງມີກິດຈະກຳຖາມ-ຕອບ ຄວາມຮູ້ຮອບຕົວ ເພື່ອແຈກຂອງຂວັນລາງວັນຢ່າງຫຼວງຫຼາຍຈາກກຸງສີ ລິດຊິ້ງ ອີກ.

ກິດຈະກຳຄັ້ງນີ້,  ນຳພາການມອບຄວາມສຸກໃຫ້ເດັກນ້ອຍ ໂດຍ ທ່ານ ຊັດຊະວານ ເພີ່ມສຸກຈາຣຸຊັບ ຜູ້ອຳນວຍການໃຫຍ່ກຸງສີ ລິດຊິ້ງ, ພ້ອມດ້ວຍພະນັກງານ ຂອງກຸງສີທຸກໆຄົນ ທີ່ໄດ້ຈັດກິດຈະກຳດີໆແບບນີ້ຂຶ້ນມາເພື່ອນ້ອງໆ.

ທ່ານ ຊັດຊະວານ ເພີ່ມສຸກຈາຣຸຊັບ ກ່າວວ່າ:  ບໍລິສັດ ກຸງສີ ລິດຊີ້ງ ແມ່ນໄດ້ເລັ່ງເຫັນຄວາມສຳຄັນຕໍ່ເດັກນ້ອຍ ເພາະເປັນອະນາຄົດຂອງຊາດ, ເຊິ່ງກິດຈະກຳນີ້ກໍເປັນກິດຈະກຳໜຶ່ງທີ່ ທາງກຸງສີ ລິດຊິ້ງ ໄດ້ຊ່ວຍເຫຼືອທາງດ້ານການສຶກສາໃນກັບເດັກນ້ອຍ ກ່ອນໜ້ານີ້ ແມ່ນເຮົາກໍໄດ້ຈັດກິດຈະກຳ ຊ່ວຍເຫຼືອເງິນ ສົມທົບທຶນໃຫ້ກັບໂຮງຮຽນປະຖົມປາກງື່ມ 50 ລ້ານກີບ ໂດຍຜ່ານກະຊວງສຶກສາທິການ ແລະ ກິລາ ແລະ  ຕໍ່ໄປທາງ ກຸງສີ ລິດຊິ້ງ ພວກເຮົາກໍຈະມີການຈັດກິດຈະກຳດີໆແບບນີ້ຕໍ່ໄປເລື້ອຍໆ ອະນາຄົດກໍຈະມີການຂະຫຍາຍໄປທາງໂຮງຮຽນອື່ນໆ ແລະ ແຂວງອື່ນໆທົ່ວປະເທດ.

ຄວາມຮູ້ສຶກຂອງນ້ອງໆ ທີ່ໄດ້ມາຮ່ວມກິດຈະກຳນີ້ ນ້ອງ ແສງອາທິດ ວົງພູທອນ ອາຍຸ 10 ປີ ນັກຮຽນຊັ້ນ ປໍ 5 ໄດ້ກ່າວວ່າ: ຕົນເອງດີໃຈຫຼາຍທີ່ໄດ້ມາເປັນສ່ວນໜຶ່ງຂອງກິດຈະກຳວັນເດັກນ້ອຍ ທີ່ກຸງສີ ລິດຊິ້ງ ຈັດຂຶ້ນ ນ້ອງຂໍຂອບໃຈຫຼາຍ ທີ່ໄດ້ມອບຄວາມສະໜຸກສະໜານມ່ວນຊື່ນ, ໃຫ້ເບິ່ງຮູບເງົາ ໂດເລມອນ  ແລະ ຍັງໄດ້ຄວາມຮູ້ ເລື່ອງການປະຢັດເງິນ, ການເກັບທ້ອນເງິນນຳອີກ.

Comments