Senglao content (728×90)
Senglao content (728×90)

ກອງປະຊຸມສະໄຫມສາມັນເທື່ອທີ 5 ຂອງສະພາແຫ່ງຊາດ ຊຸດທີ 8 ໄຂຂຶ້ນຢ່າງເປັນທາງການ

ໃນຕອນເຊົ້າຂອງມື້ນີ້, ວັນທີ 5 ມິຖຸນາ 2018 ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ 8 ໄດ້ໄຂຂຶ້ນຢ່າງເປັນທາງການ  ທີ່ຫ້ອງປະຊຸມສະພາແຫ່ງຊາດ (ຫຼັກ 6), ນະຄອນຫຼວງວຽງຈັນ ໂດຍການເຂົ້າຮ່ວມຂອງການນໍາພັກ-ລັດຂັ້ນສູງ ສະມາຊິກສະພາແຫ່ງຊາດທົ່ວປະເທດ ແລະ ພາກສ່ວນຕ່າງໆ .

ກອງປະຊຸມຈະດໍາເນີນໄປເຖິງ ວັນທີ 28 ມິຖຸນາ 2018 ເຊິ່ງຈະໃຊ້ເວລາດໍາເນີນກອງປະຊຸມທັງໝົດ 18 ວັນ. ໃນໄລຍະດຳເນີນກອງປະຊຸມສະພາແຫ່ງຊາດ, ຄະນະເລຂາທິການສະພາແຫ່ງຊາດ ໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄໍາສະເໜີໂດຍກົງ ຈາກປະຊາຊົນ ທີ່ຈະສົ່ງໄປຍັງກອງປະຊຸມ, ເຊິ່ງສາມາດສົ່ງຄຳຄິດຄຳເຫັນ ແລະ ຄຳສະເໜີ ໄປຍັງກອງປະຊຸມຜ່ານ ໂທລະສັບສາຍດວ່ນ 156; ໂທລະສານ ໝາຍເລກ: 021 413 528; ສົ່ງເປັນຈົດໝາຍທາງໄປສະນີ ຕູ້ ປນ. 662 ຫລື ສົ່ງອີເມວ: [email protected]

ພາຍຫຼັງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ກ່າວສູນທອນພົດໄຂກອງປະຊຸມແລ້ວ,  ບັນດາສະມາຊິກສະພາແຫ່ງຊາດ ແລະ ຜູ້ເຂົ້າຮ່ວມ  ກໍໄດ້ຮັບຟັງບົດລາຍງານຂອງ ​ທ່ານ ທອງລຸນ ສີສຸລິດ  ​ນາຍົກລັດຖະມົນ​ຕີ ແຫ່ງ ສປປ ລາວ ດ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງໃນ 4 ເດືອນຕົ້ນປີ 2018, ຄາດຄະເນແຜນການ 6 ເດືອນຕົ້ນປີ 2018 ແລະ ທິດທາງວຽກງານຈຸດສຸມ 6 ເດືອນທ້າຍປີ 2018 ຂອງລັດຖະບານຕໍ່ກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ໃນເຊົ້າມື້ນີ້ ໂດຍທ່ານ ນາຍົກໄດ້ລາຍງານວ່າ ການພັດທະນາທາງດ້ານເສດຖະກິດໂດຍລວມແມ່ນດຳເນີນໄປຕາມຄາດໝາຍ ແລະ ແຜນການທີ່ວາງໄວ້. ອີງຕາມຂໍ້ມູນທີ່ເກັບກຳໄດ້ໃນ 4 ເດືອນ ອັດຕາການເຕີບໂຕຂອງເສດຖະກິດໃນ 6 ເດືອນຕົ້ນປີ ຄາດວ່າຈະບັນລຸລະດັບ 6,7% ໃນນັ້ນຂະແໜງກະສິກຳຄາດວ່າຈະເພີ່ມຂຶ້ນ 2,9% ກວມ 15,9% ຂອງຈີດີພີ, ຂະແໜງອຸດສາຫະກຳເພີ່ມຂຶ້ນ 7% ກວມ 31,2% ຂອງຈີດີພີ, ຂະແໜງບໍລິການເພີ່ມຂຶ້ນ 7,9% ກວມເອົາ 41,7%ຂອງ ຈີດີພີ, ພາສີນຳເຂົ້າເພີ່ມຂຶ້ນ 6,8% ກວມ 11,2% ຂອງຈີດີພີ. ຈີດີພີ ຄິດເປັນມູນຄ່າຕາມລາຄາໃນປີປະມານ 152.436 ຕື້ກີບ ສະເລ່ຍຕໍ່ຫົວຄົນ 2.609 ໂດລາສະຫະລັດ.        ຫຼັງຈາກ ທ່ານ ນາຍົກລັດຖະມົນຕີລາຍງານແລ້ວ,  ຕາງໜ້າຄະນະປະຈຳສະພາແຫ່ງຊາດ  ກໍໄດ້ປະກອບຄຳເຫັນໃສ່ບົດລາຍງານດັ່ງກ່າວ,  ຕໍ່ຈາກນັ້ນ ທ່ານປະທານກອງປະຊຸມ  ກໍຈະມີຄໍາຖາມເຈາະຈີ້ມ  ແລະ ໃຫ້ທິດຊີ້ນຳໃນການປະກອບຄໍາເຫັນ ຂອງບັນດາສະມາຊິກສະພາແຫ່ງຊາດ.

Comments