Senglao content (728×90)
Senglao content (728×90)

ສສຊ ສະເໜີໃຫ້ລັດຖະບານແກ້ໄຂ ຂອດຕະຫຼາດຈຳໜ່າຍ ສິນຄ້າ

​ໃນ​ມື້​ທີສອງ ​ຂອງ​ການ​ດຳ​ເນີນ​ກອງ​ປະຊຸມ ສະ​ໄໝ​ສາມັນ ​ເທື່ອ​ທີ 5  ຂອງ​ສະພາ​ແຫ່ງ​ຊາດ ຊຸດ​ທີ VIII ​​ໃນ​ວັນ​ທີ 6 ມິຖຸນາ 2018 ນີ້,  ​ບັນດາ​ສະມາຊິກ​ສະພາ​ແຫ່ງ​ຊາດ (ສສຊ)  ປະຈຳ​ເຂດ​ເລືອກ​ຕັ້ງຕ່າງໆ  ໄດ້​ສືບ​ຕໍ່ປະກອບ​ຄຳ​ຄິດ​ຄຳ​ເຫັນ​ໃສ່ ບົດ​ລາຍ​ງານ​ຂອງລັດຖະບານ  ກ່ຽວ​ກັບການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ,  ​ແຜນ​ງົບປະມານ​ແຫ່ງ​ລັດ ປະຈຳ 4 ​ເດືອ​ນ  ໂດຍ ສສຊ ສ່ວນໃຫຍ່ໄດ້ສະແດງຄວາມເປັນຫ່ວງ  ແລະ ຮຽກຮ້ອງ ​ໃຫ້​ລັດຖະບານ ກວດກາຄືນ ການຊຸກຍູ້ສົ່ງ​ເສີມ​ການ​ຜະລິດ​​ເປັນສິນຄ້າ  ​ໃນ​ໄລຍະ​ຜ່ານ​ມາ, ລວມທັງ​ສິນຄ້າ​ໂອ​ດັອບ  ​ເຫັນ​ວ່າ​ມີ​ຂະ​ບວນຟົດຟື້ນ  ​ແຕ່​ບໍ່​ມີ​ຕະຫລາດ​ວາງ​ຈຳໜ່າຍ,  ພ້ອມ​ນັ້ນ ຍັງ​ສະ​ເໜີໃຫ້​ເບິ່ງ​ຄືນການຈັດ​ຕັ້ງ ​ປະຕິບັດ​ນະ​ໂຍບາຍ​ສົ່ງ​ເສີມ​ທຸລະ​ກິດ​ຂະໜາດ​ນ້ອຍ​,  ກາງ ຕິດ​ພັນ​ກັບ​ການ​ສ້າງ​ວຽກ​ເຮັດ​ງານ​ທຳ  ​ແລະ ສ້າງ​ລາຍ​ຮັບ​ຕົວ​ຈິງ ​ໃຫ້​ປະຊາຊົນຍັງ​ບໍ່​ມີ​ມາດ​ຕະການ​ ຈັດ​ຕັ້ງ​ປະຕິບັດ​ຕົວ​ຈິງ.

ນອກນີ້, ບັນດາ ສສຊ ຍັງສະເໜີໃຫ້ພາກລັດ  ປັບປຸງແກ້ໄຂຫຼາຍດ້ານ ທີ່ເຫັນວ່າຍັງ​ບໍ່​ທັນ​ສອດ ຄ່ອງ ​ເປັນຕົ້ນ:  ການຈັດ​ສັນ​ທຶນ​ພາຍ​ໃນ ​ເຂົ້າ​ໃສ່​ໂຄງການ​ລົງທຶນ​ຂອງ​ລັດ,  ບັນຫາຄວາມຊັດ​ເຈນ​ກ່ຽວ​ກັບ​ລາຍ​ຮັບ​ຕໍ່​ຫົວ​ຄົນ,  ມາດ​ຕະການ​ ການ​ສະກັດ​ກັ້ນ​ການ​ນຳ​ເຂົ້າ​ສິນ​ຄ້າ  ​ປະເພດພາຫະນະລົດ​, ການສະກັດ​ກັ້ນ​ການ​ປອມ​ແປງ​ສິນຄ້າ,  ​​ກຳນົດ ​ແລະ ຄວບ​ຄຸມ​ລາຄາ​ສິນຄ້າ​ໃຫ້​ຄົງ​ທີ່  ​ເປັນ​ຕົ້ນ​ແມ່ນ​ລາຄາ​ເຂົ້າ,  ການ​ປັບປຸງ​ພື້ນຖານ​ໂຄງ​ລ່າງ​ດ້ານ​ການທ່ອງທ່ຽວ  ​ແລະ ການລົງທຶນ​ຢ່າງ​ຈິງ​ຈັງ ​ເຂົ້າ​ໃນ​ການ​ລົງທຶນ​ດ້ານ​ວິທະຍາສາດ.

ພ້ອມ​ນີ້, ສສຊ ຫຼາຍທ່ານ​ໄດ້ຢ້ຳຄືນຢ່າງຕໍ່ເນື່ອງ  ກ່ຽວ​ກັບບັນຫາການເກີດອຸບັດເຫດຕາມທ້ອງຖະໜົນ  ເຊິ່ງເຫັນຕົວເລກພຽງອາທິດດຽວ ມີຫຼາຍກວ່າ 20 ກໍລະນີ, ການປຸ້ນ-ຊີງຊັບ ລວມໄປເຖິງການປຸ້ນທະນາຄານ  ແລະ ບັນຫາຢາເສບຕິດ ນັບມື້ເພີ່ມຂຶ້ນ  ອັນໄດ້ສົ່ງຜົນກະທົບຕໍ່ການພັດທະນາເສດ ຖະກິດ.
ສ່ວນວຽກ​ງານ​ສາມ​ສ້າງ ກໍ​ເປັນ​ວຽກ​ງານ​ໜຶ່ງ  ທີ່ ສສຊ ມີຄວາມສົນໃຈ ແລະ ລົງ​ເລິກ​  ໃຫ້ລັດຖະບານ ປັບປຸງ​ແກ້​ໄຂ  ​ມາເຖິງປັດຈຸບັນ ເຫັນວ່າປະຕິບັດບໍ່ທັນໄດ້ດີ  ແລະ ບໍ່​ໄດ້​ຕາມ​ຄາດໝາຍ​ທີ່​ວາງ​ໄວ້,  ການ​ຈັດ​ຕັ້ງ​ປະຕິບັດ​ບໍ່​ໄປ​ຕາມ​ບາດ​ກ້າວ,  ບໍ່​ໄປ​ຕາມ​ຂັ້ນຕອນ, ປະຊາຊົນ​ຢູ່​ທ້ອງ​ຖິ່ນຊົນນະບົດຍັງມີຄວາມທຸກຍາກຈຳນວນຫຼາຍ.

ອີກບັນຫາໜຶ່ງທີ່ ສສຊ ເປັນຫ່ວງ  ພາຍຫຼັງທີ່ພົບເຫັນເຈົ້າໜ້າທີ່ລັດສ່ວນຫຼາຍ ເປັນຜູ້ລະເມີດ ລະບຽບກົດໝາຍ ເປັນຜູ້ທີ່ມີການສໍ້ລາດບັງຫຼວງ,  ຢ່າງໃດກໍຕາມ ອາດຈະບໍ່ພຽງແຕ່ 421 ຄົນ  ທີ່ກວດພົບເຫັນການກະທຳຜິດ ໃນຂະແໜງປ່າໄມ້ ຫຼື ລະເມີດ ຄຳສັ່ງ15/ນຍ ແຕ່ອາດຈະມີ ພະນັກງານຈຳນວນຫຼວງຫຼາຍ   ທີ່ກະທຳຜິດໃນຂົງເຂດອື່ນໆ  ໂດຍສະເພາະ  ໃນຂົງເຂດການເງິນ ຈຶ່ງສະເໜີໃຫ້ລັດຖະບານ   ດຳເນີນການລົງໂທດຕາມຄວາມເໝາະສົມ.  ພ້ອມ​ນີ້,​ ສສຊ ​ໄດ້ສະເໜີລັດຖະບານ ຄວນໃຫ້ຄວາມ ສຳຄັນ ແລະ ດຳເນີນການຊົດເຊີຍ  ໃຫ້ແກ່ຜູ້ໄດ້ຮັບຜົນກະທົບໂຄງການສ້າງທາງລົດໄຟ ລາວ-ຈີນ,  ເຂື່ອນໄຟຟ້າ ແລະ ຜູ້ໄດ້ຮັບຜົນກະທົບ ຈາກໂຄງການອື່ນໆ   ໂດຍສະເພາະຄອບຄົວທີ່ມີຄວາມຈຳເປັນ  ໃນການດຳລົງຊີວິດ ປະຈຳວັນ.

ສສຊ ຍັງສະເໜີໃຫ້ລັດຖະບານ  ເບິ່ງຄືນການເກັບລາຍຮັບ, ຄຸ້ມຄອງລາຍຈ່າຍ   ໃຫ້ນຳເອົາລະບົບທັນສະໄໝເຂົ້າ ໃນຂະແໜງເກັບລາຍຮັບ(ພາສີ-ອາກອນ)   ໃຫ້ເປັນຮູບປະທຳ ເພື່ອຫລີກເວັ້ນການຮົ່ວໄຫຼ,  ກວດກາຄືນ ບັນດາໂຄງການຕ່າງໆ ທີ່ມີມູນຄ່າສູງເກີນຄວາມຈິງ ແລະ ບັນດາໂຄງການນອກແຜນຢ່າງເຄັ່ງຄັດ  ເພື່ອບໍ່ໃຫ້ລະເມີດຕໍ່ລະບຽບກົດໝາຍ,  ປັບປຸງບັນດາລັດວິສາຫະກິດ ໃຫ້ສາມາດເດີນໄປໄດ້ດ້ວຍດີ,  ເພີ່ມທະວີສະກັດກັ້ນ ບັນຫາສິ່ງຫຍໍ້ທໍ້  ແລະ ບັນຫາຕ່າງໆໃນສັງຄົມ ເປັນຕົ້ນ  ບັນຫາການຄ້າຂາຍ ແລະ ເສບຢາເສບຕິດ  ໂດຍຈັດຕັ້ງປະຕິບັດບັນດາມາດຕະການ ບັງຄັບໃຊ້ກົດໝາຍເພື່ອສ້າງ ສະຕິເຄົາລົບກົດໝາຍ ແລະ ລະບຽບການ;  ສະເໜີໃຫ້ລັດຖະບານ ຊຸກຍູ້ສົ່ງເສີມຜູ້ປະກອບການລາວໃຫ້ຫຼາຍຂຶ້ນ  ເພາະການອະນຸຍາດໃຫ້ຜູ້ປະກອບການຕ່າງປະເທດ  ເຂົ້າມາເຄື່ອນໄຫວລົງທຶນຢູ່ ສປປ ລາວ  ໄດ້ສົ່ງຜົນກະທົບຕໍ່ຜູ້ປະກອບການລາວ.

ທີ່ມາ: ຂ່າວສານປະເທດລາວ.

Comments