Senglao content (728×90)
Senglao content (728×90)

45 ປີແຫ່ງການເຕີບໃຫຍ່ຂອງ ບໍລິສັດ ເບຍລາວ ພ້ອມກັບນຳສະເໜີ 3 ຜະລິດຕະພັນໃຫມ່ອອກສູ່ສັງຄົມ

ປີນີ້ບໍລິສັດເບຍລາວ ໄດ້ມີອາຍຸ 45 ປີ  ແຫ່ງການເດີນທາງຜ່ານຈຸດເວລາຕ່າງໆ ທີມີທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍ ທີ່ມາທົດສອບ ຈົນສາມາດກ້າວມາຮອດທຸກມື້ນີ້ໄດ້ ແລະ ໄດ້ກາຍເປັນບໍລີສັດໜຶ່ງທີ່ມີບົດຮຽນ ແລະ ຜົນສຳເລັດທີ່ສຸດໃນການດຳເນີນທຸລະກິດໃນປະເທດລາວ.

ໃນມື້ວານນີ້ ຕອນແລງ ວັນທີ 10 ກໍລະກົດ 2018 ບໍລິສັດເບຍລາວ ຈຳກັດ ໄດ້ຈັດງານສະເຫຼີມສະຫຼອງ ຄົບຮອບ 45 ປີ ໃນການສ້າງຕັ້ງບໍລິສັດ ນັບຕັ້ງແຕ່ປີ 1973, ໃຫ້ກຽດເຂົ້າຮ່ວມໂດຍທ່ານ ກິດສະໜາ ວົງໄຊ ປະທານສະພາບໍລິຫານ ບໍລິສັດເບຍລາວ ຈຳກັດ, ທ່ານ Henrik Juel Anderson ປະທານບໍລິສັດເບຍລາວ ຈຳກັດ, ມີບັນດາຄະນະຜູ້ບໍລິຫານ, ພະນັກງານ ບໍລິສັດເບຍລາວເຂົ້າຮ່ວມຢ່າງຄຶກຄື້ນມ່ວນຊື່ນ.

ປັດຈຸບັນ, ບໍລິສັດເບຍລາວ ມີສິນຄ້າ 3 ໜວດຄື: ເບຍ, ນໍ້າຫວານອັດລົມ ແລະ ນໍ້າດື່ມຫົວເສືອ ບໍລິສັດກາຍເປັນຜູ້ນຳ ແລະ ກວມເອົາສ່ວນໃຫຍ່ຂອງການຕະຫຼາດພາຍໃນປະເທດ. ແລະ ບໍລິສັດເບຍ ໄດ້ກາຍເປັນບໍລິສັດອັນດັບຕົ້ນໆຂອງກຸ່ມບໍລິສັດທີ່ປະຕິບັດພັນທະງົບປະມານຫຼາຍໃຫ້ລັດຖະບານ, ທັນເວລາ ແລະ ເພີ່ມຂຶ້ນທຸກປີຢ່າງຕໍ່ເນື່ອງ. ພ້ອມນີ້, ບໍລິສັດຍັງໄດ້ເອົາໃຈໃສ່ປະກອບສ່ວນຊ່ວຍຊຸກຍູ້ສັງຄົມ ແລະ ຮ່ວມກັບອົງກອນຕ່າງໆໃນການສົ່ງເສີມສັງຄົມ ກໍຄືການສຶກສາ ແລະ ສິ່ງແວດລ້ອມ.

ໃນໂອກາດພິເສດໃນການສະເຫຼີມສະຫຼອງ 45 ປີນີ້ ເບຍລາວໄດ້ອອກສິນຄ້າໃຫມ່ 3 ຜະລິດຕະພັນ ເພື່ອເປັນການຮ່ວມສະເຫຼີມສະຫຼອງໃຫ້ກັບຄວາມສຳເລັດອັນຍິ່ງໃຫຍ່ຂອງເບຍລາວຄື: ເບຍ ໄວທ (WHATH), ເບຍແອມເບີ (AMBER), ເບຍ ຮອບປີ ( HOPPY).

 

Comments