Senglao content (728×90)

ລາວ-ກຳປູເຈຍ ຕີລາຄາສູງການພົວພັນຮ່ວມມືສອງຝ່າຍ

ໂດຍຕອບສະໜອງ ຕາມການເຊື້ອເຊີນ ຂອງສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ນາຍົກລັດຖະມົນຕີ ແຫ່ງ ຣາຊະອານາຈັກ ກຳປູເຈຍ. ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມພັນລະຍາ ແລະ ຄະນະຜູ້ແທນຂັ້ນສູງຂອງ ສປປ ລາວ ໄດ້ເດີນທາງຢ້ຽມຢາມ ຣາຊະອານາຈັກ ກຳປູເຈຍ ແຕ່ວັນທີ 27-28 ມີຖຸນາ 2016 ນີ້.                                                    ໃນການພົບປະສອງຝ່າຍເຫັນວ່າການການພົວພັນ ຮ່ວມມືສອງຝ່າຍ ມີການຂະຫຍາຍຕົວ ເພີ່ມຂຶ້ນຢ່າງຕໍ່ເນື່ອງ, ເຊິ່ງເຫັນໄດ້ ການໄປມາຫາສູ່ກັນ ໄດ້ມີການແລກປ່ຽນ ການຢ້ຽມຢາມ ໃນລະດັບປະມຸກລັດ, ຫົວໜ້າລັດຖະບານ ແລະ ຂະແໜງການອື່ນໆ ຕະຫລອດເຖິງທ້ອງຖິ່ນ ທີ່ມີຊາຍແດນຕິດຈອດກັນ. ເພີ່ມທະວີການ ຮ່ວມມືການຈັດຕັ້ງ ປະຕິບັດ ບັນດາສັນຍາ ແລະ ຂໍ້ຕົກລົງຕ່າງໆ ທີ່ສອງຝ່າຍໄດ້ຕົກລົງ ຮ່ວມກັນ ໃຫ້ເກີດດອກອອກຜົນ ແລະ ເປັນຮູບປະທຳ; ສືບຕໍ່ເພີ່ມທະວີ ການຮ່ວມມືກັນ ໃນການຮັກສາ ຄວາມສະຫງົບ, ສະກັດກັ້ນ ການເຄື່ອນໄຫວຂອງຄົນບໍ່ດີ, ການລັກລອບຂົນສົ່ງ-ຄ້າຂາຍ ຢາເສບຕິດ ແລະ ປະກົດການຫຍໍ້ທໍ້ອື່ນໆ ເພື່ອຮັກສາສັນຕິພາບ, ສະຖຽນລະພາບ ລຽບຕາມເສັ້ນຊາຍແດນສອງປະເທດ. ສອງຝ່າຍເຫັນດີ ຈະເປີດດ່ານສາກົນ ໜອງນົກຂຽນ-ຕຣາປຽງກຣຽນ ຢ່າງເປັນທາງການ ໃນທ້າຍປີນີ້. ເຫັນດີສ້າງຕັ້ງ ສະຖານກົງສູນໃຫຍ່ ຂອງສອງປະເທດ ຢູ່ປະເທດຂອງກັນ ແລະ ກັນ ເຊິ່ງຝ່າຍລາວ ຕັ້ງກົງສູນໃຫຍ່ ຢູ່ແຂວງຊຽງແຕງ ຂອງກຳປູເຈຍ ແລະ ຈະເປີດພິທີ ຢ່າງເປັນທາງການ ໃນວັນທີ 30 ມິຖຸນາ 2016 ນີ້ ແລະ ຝ່າຍກໍາປູເຈຍ ຕັ້ງຢູ່ແຂວງຈໍາປາສັກ ແລະ ຈະເປີດພິທີ ໃນວັນທີ 1 ກໍລະກົດ 2016 ນີ້, ສອງຝ່າຍ ຈະພະຍາຍາມສ້າງພື້ນຖານໂຄງລ່າງ ເພື່ອເຊື່ອມຈອດ ລະຫວ່າງສອງປະເທດ ເຊັ່ນ: ໂຄງການກໍ່ສ້າງເສັ້ນທາງ ແລະ ຂົວເຊລຳເພົາ ທີ່ມີຄວາມຍາວ145 ແມັດ ແລະ ເສັ້ນທາງເຊື່ອມຈອດ ແຕ່ເມືອງມູນລະປະໂມກ ຫາ ຂົວເຊລຳເພົາຍາວ78 ກິໂລແມັດ; ທັງສອງຝ່າຍ ຈະຊຸກຍູ້ໃຫ້ມີການລົງທຶນ, ການຄ້າຮ່ວມກັນຫລາຍຂຶ້ນ ໂດຍສະເພາະ ໃຫ້ເຂົ້າໄປລົງທຶນ ຢູ່ໃນປະເທດຂອງກັນ ແລະ ກັນ, ການຄ້າ ລະຫວ່າງແຂວງ ທີ່ມີຊາຍແດນຕິດຈອດກັນ, ໃນປີ 2015 ການຄ້າສອງຝ່າຍ ສາມາດບັນລຸໄດ້ 24,5 ລ້ານໂດລາສະຫາລັດ ສ່ວນໃຫຍ່ ແມ່ນອຸດສາຫະກໍາບໍ່ແຮ່, ການຂາຍຍົກ-ຂາຍຍ່ອຍ, ການເຄື່ອນໄຫວ ດ້ານການເງິນ ແລະ ປະກັນໄພ ດ້ານການສຶກສາ ສອງຝ່າຍເຫັນດີ ເປັນເອກະພາບເພີ່ມທຶນແລກປ່ຽນ ການສຶກສາປະລິນຍາຕີ ລະຫວ່າງ ສອງລັດຖະບານ ເປັນ15 ທຶນຕໍ່ປີ ແລະ ເພີ່ມເບ້ຍລ້ຽງ ໃຫ້ແກ່ນັກສຶກສາ ຂອງສອງປະເທດ ເພື່ອໃຫ້ແທດເໝາະກັບຄ່າຄອງຊີບ ຂອງແຕ່ລະປະເທດ. ນອກນີ້, ສອງຝ່າຍ ຍັງເຫັນດີໃຫ້ການຮ່ວມມື ຢ່າງໃກ້ຊິດ ແລະ ສະໜັບສະໜູນ ຊ່ວຍເຫລືອເຊິ່ງກັນ ແລະ ກັນໃນເວທີພາກພື້ນ ແລະ ສາກົນເຊັ່ນ: CLV, CLMV, ACMEC, AESAN, UN, GMS ແລະ ອື່ນໆ.

ໃນໂອກາດນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມພັນລະຍາ ແລະ ຄະນະຜູ້ແທນ ໄດ້ເຂົ້າຢ້ຽມຂໍ່ານັບ ພະມະຫາກະສັດ ໂນໂຣດົມ ສີຫາໂມນີ ເຈົ້າຊີວິດ ແຫ່ງຣາຊະອານາຈັກ ກຳປູເຈຍ ໃນຕອນເຊົ້າ ວັນທີ 28 ມີຖຸນາ2016 ທີ່ ພະລາດຊະວັງ ນະຄອນຫລວງ ພະນົມເປັນ ຣາຊະອານາຈັກ ກຳປູເຈຍ.

ພະມະຫາກະສັດ ໂນໂຣດົມ ສີຫາໂມນີ ເຈົ້າຊີວິດ ແຫ່ງຣາຊະອານາຈັກ ກຳປູເຈຍ ກໍໄດ້ສະແດງຄວາມຍິນດີ ຕ້ອນຮັບ ແລະ ຊົມເຊີຍ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມພັນລະຍາ ແລະ ຄະນະຢ້ຽມຢາມ ຣາຊະອານາຈັກ ກຳປູເຈຍ ເຊິ່ງເປັນການຢ້ຽມຢາມ ທີ່ມີຄວາມໝາຍ ຄວາມສຳຄັນ ໃນການເພີ່ມທະວີ ຮັດແໜ້ນ ແລະ ເສີມຂະຫຍາຍ ສາຍພົວພັນມິດຕະພາບ ທີ່ມີມາແຕ່ດົນນານ ລະຫວ່າງ ສອງປະເທດໃຫ້ແໜ້ນແຟ້ນຍິ່ງຂຶ້ນ.

ທ່ານ ທອງລຸນ ສີສຸລິດ ກໍໄດ້ສະແດງ ຄວາມຂອບໃຈຢ່າງສູງ ຕໍ່ການຕ້ອນຮັບ ອັນອົບອຸ່ນຂອງ ພະມະຫາກະສັດ ໂນໂຣດົມ ສີຫາໂມນີ ເຈົ້າຊີວິດ ແຫ່ງ ຣາຊະອານາຈັກ ກຳປູເຈຍ ໃນໂອກາດເຂົ້າຢ້ຽມ ຂໍ່ານັບຄັ້ງນີ້ ພ້ອມທັງໄດ້ແຈ້ງ ຜົນການພົບປະກັບ ສະເດັດ  ຮຸນແຊນ ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ຊາບ. ສອງຝ່າຍໄດ້ຕີລາຄາ ການພົວພັນ ແລະ ການຮ່ວມມື ມີການຂະຫຍາຍຕົວ ເພີ່ມຂຶ້ນຢ່າງຕໍ່ເນື່ອງ ແລະ ໄດ້ນຳເອົາ ຄວາມຢື້ຢາມຖາມຂ່າວ ຂອງທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ເຖິງ ພະມະຫາກະສັດ ໂນໂຣດົມ ສີຫາໂມນີ ເຈົ້າຊີວິດ ແຫ່ງ ຣາຊະອານາຈັກ ກຳປູເຈຍ ໃນໂອກາດນີ້ດ້ວຍ.ການຢ້ຽມຢາມ ຣາຊະອານາຈັກ ກຳປູເຈຍ ຂອງທ່ານ ນາຍົກລັດຖະມົນຕີ ແຫ່ງ ສປປ ລາວ ຍັງໄດ້ພົບປະກັບ ສົມເດັດ ເຮັງຊຳຣິນ, ປະທານສະພາແຫ່ງຊາດ ທີ່ສະພາແຫ່ງຊາດ, ພົບປະກັບສົມເດັດ ຊາຍຊຸມ ປະທານສະພາສູງ ຣາຊະອານຈັກ ກຳປູເຈຍ ຕື່ມອີກ ແລະ ໃນຕອນບ່າຍ ຂອງວັນທີ 28 ມິຖຸນາ ນີ້ ທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມພັນລະຍາ ແລະ ຄະນະ ໄດ້ເດີນທາງເຖິງ ນະຄອນຫລວງວຽງຈັນ ດ້ວຍຄວາມສະຫວັດດີພາບ.ຂ່າວ-ພາບ:ຂປລ.

ສະແດງຄຳຄິດເຫັນ