Senglao content (728×90)

ທ່ອງທ່ຽວດິນແດນ ອັດຕະປື ຜືນແຜ່ນດິນຄໍາ

    ໃນອາທິດນີ້ ວາລະສານທາເກັດ ຈະພາທຸກທ່ານໄປທ່ອງທ່ຽວດິນແດນທາງພາກໃຕ້ຂອງປະເທດລາວ ແຂວງອັດຕະປື ເປັນແຂວງທີ່ຕັ້ງຢູ່ທາງພາກໃຕ້ສຸດຂອງລາວທາງເບື້ອງຕາ­ເວັນອອກສຽງໃຕ້ ແລະ ເປັນແຂວງທີ່ເຈົ້າໄຊຍະເຊດຖາທິຣາຊ ກະສັດລາວຜູ້ລືຊື່ໄດ້ສິ້ນພະຊົນ ( ເສຍຊີວິ) ລົງໃນປີ ຄສ 1572. ໃນປັດ­ຈຸບັນແຂວງອັດຕະປືໄດ້ກາຍເປັນເຂດສາມຫລ່ຽມພັດ­ທະ­ນາເສດ­ຖະ­ກິດ ລະຫວ່າງລາວ-ຫວຽດນາມ-ກຳປູເຈຍ ­ເປັນເຂດພັດ­ທະ­ນາເພື່ອສົ່ງ­ເສີມການຄ້າ ແລະ ການທ່ອງທ່ຽວໃນອະ­ນຸພາກພື້ນທີ່ຕິດພັນກັບທຳມະຊາດ ແລະ ວັດທະ­ນະທຳ, ເຊິ່ງເປັນສະ­ຖານ­ທີ່ທ່ອງທ່ຽວບ່ອນຫນຶ່ງທີ່ສວຍງາມໂດຍສະ­ເພາະກໍ່ແມ່ນຫນອງຟ້າອັນສວຍງົົດງາມເປັນຫນ້າງຶດ­ງໍ້ ແລະ ມະ­ຫັດ­ສະ­ຈັນເໝືອນດັ່ງຄໍາຂັວນທີ່ວ່າ “ ລໍານໍ້າໃສ ປ່າໄມ້ຂຽວ ທ່ອງທ່ຽວໜອງຟ້າ ຊົມຜາຮຽງຊານໄຊ ໄຫ້ວພະອົງແສນ ພັກແດນສາມັກຄີ ” ເຊິ່ງເປັນຄໍາຂັວນຂອງແຂວງອັດຕະປື ທີ່ອຸດົມສົມບູນໄປດ້ວຍຊັບໃນດິນສິນໃນນໍ້າຈົນເປັນທີ່ກ່າວຂານກັນວ່າ “ ອັດຕະປື ຂາຍຄໍາແລກໄກ່ ” ນອກຈາກນີ້ແລ້ວຍັງມີສະຖານທີ່ທ່ອງທ່ຽວອີກຫຼາຍແຫ່ງເຊັ່ນ: ໜອງຟ້າ, ນໍ້າຕົກຕາດຫົວຄົນ, ນໍ້າຕົກຕາດແຊພະ, ວັດທາດເຈົ້າໄຊຍະເຊດຖາທິຣາຊ, ລູກສອນໄຟ, ໄມ້ກາຍເປັນຫີນ, ບ້ານເຜົ່າເບຣົາ ແລະ ຍັງມີອີກຫຼາຍໆສະຖານທີ່.

ໜອງຟ້າ: ເປັນໜຶ່ງໃນສະຖານທີ່ທ່ອງທ່ຽວທີ່ມີສະເນ່ທີ່ສຸດໃນປະເທດລາວ, ເປັນໜອງນໍ້າໃຫຍ່ຕັ້ງຢູ່ເທິ່ງພູສູງມີນໍ້າໃນໜອງເປັນສີ “ ມໍລະກົດ ” ໃສສະອາດຄ້າຍຄືນໍ້າທະເລ ມີຄວາມງົດງາມ ແລະ ມະຫັດສະຈັນທີ່ສຸດ. ໜອງຟ້າຖືກຄົ້ນພົບຄັ້ງທໍາອິດໃນປີ 1930 ໂດຍນັກທໍລະນີຊາວຝຣັ່ງ ໜອງຟ້າຕັ້ງຢູ່ເຂດບ້ານ ວັງຕັດ ເມືອງຊານໄຊ ຫ່າງຈາກເທດສະບານແຂວງອັດຕະປືໄປທາງທິດຕາເວັນອອກປະມານ 178 ກິໂລແມັດ ແລະ ເປີດເປັນແຫຼ່ງທ່ອງທ່ຽວຢ່າງເປັນທາງການໃນປີ 2004. ໜອງຟ້າກວ້າງປະມານ 1 ກິໂລແມັດມົນທົນ, ມີລະດັບຄວາມສູງທຽບໃສ່ໜໍ້າທະເລປະມານ 1,200 – 1,500 ແມັດ, ມີແປວທາງນໍ້າໄຫຼລົງໃສ່ນໍ້າເຊກະໝານຢູ່ໃນເຂດປ່າສະຫງວນແຫ່ງຊາດ ດົງອໍາພາມ ໃນພື້ນທີ່ຫົວພູຈຸ້ມເຂົ້າກັນໃກ້ຊາຍແດນລາວ – ຫວຽດນາມ ການກໍາເນີດຂຶ້ນຂອງໜອງນໍ້າມະຫັດສະຈັນແຫ່ງນີ້ຍັງມີປິດສະໜາ ແລະ ມີການສັນນິຖານແຕກຕ່າງກັນໄປຄື: ນັກຄົ້ນຄວ້າບາງທ່ານບອກວ່າເປັນໜອງທີ່ເກີດຈາກພູໄຟລະເບີດເມື່ອຫຼາຍລ້ານປີກ່ອນ, ແຕ່ບາງທ່ານບອກວ່າເກີດຂຶ້ນຍ້ອນການຕົກລົງມາຂອງ “ ລູກອຸບາດ ”.

    ວັດທາດເຈົ້າໄຊຍະເຊດຖາທິຣາຊ: ພະເຈົ້າໄຊຍະເຊດຖາທິຣາຊ ເປັນໜຶ່ງໃນບັນດາກະສັດລາວທີ່ມີຄວາມອົງອາດກ້າຫານທີ່ສຸດ ໂດຍພະອົງໄດ້ຂຶ້ນຄອງຣາຊປົກຄອງນອກນະຄອນຊຽງທອງ ນະຄອນຊຽງໃໝ່ ແລະ ໄດ້ລົງມາເຄື່ອນໄຫວປັບປຸງກໍາລັງຢູ່ ເມືອງຣາມາລັກອົງການ (ອັດຕະປື) ໃນປີ ຄສ 1572 ເຈົ້າໄຊຍະເຊດຖາໄດ້ຖືພະຍານະຄອນໃຊ້ກົນອຸບາຍ ແລະ ປົງພະຊົນ ເຮັດໃຫ້ພະອົງເຖິງແກ່ສະຫວັນນະຄົດ(ເສຍຊີວິດ) ໃນມື້ແຮມ 3 ຄໍ່າເດືອນອ້າຍ ປີ 1572. ພະທາດຂອງເຈົ້າໄຊຍະເຊດຖາທິຣາຊ ຕັ້ງຢູ່ບ້ານວັດທາດ ເມືອງໄຊເສດຖາ ຫ່າງຈາກເທດສະບານແຂວງອັດຕະປື 15 ກິໂລແມັດ ທາດດັ່ງກ່າວຕັ້ງຢູ່ໃນວັດທາດຈຸນລະມະນີເຊິ່ງເປັນຈຸອັດຖິ(ກະດູກ) ຂອງພະເຈົ້າໄຊຍະເຊດຖາທິຣາຊ ( ນາມເດີມ ພະເຈົ້າເຊດ ຖາວັງໂສ ).

   ນໍ້າຕົກຕາດຫົວຄົນ: ຕັ້ງຢູ່ເຂດບ້ານ ໝື່ນຫົວຄົນ ເມືອງສາມັກຄີໄຊ ຫ່າງຈາກເທດສະບານແຂວງປະມານ 60 ກິໂລແມັດ ນໍ້າຕົກຕາດຫົວຄົນມີຕົ້ນກໍາເນີດມາຈາກເຊນໍ້ານ້ອຍ, ມີທິວທັດທໍາມະຊາດອັນສວຍງາມ, ຕັ້ງສະຫງ່າຢູ່ເຂດປ່າຟື້ນຟູຂອງແຂວງ ອັດຕະປື ກວ້າງປະມານ 200 ແມັດ ແລະ ສູງປະມານ 10 – 15 ແມັດ ຕາດດັ່ງກ່າວໄດ້ເປີດເປັນແຫຼ່ງທ່ອງທ່ຽວຢ່າງເປັນທາງການແຕ່ປີ 1998 ເປັນຕົ້ນມາ ມີເຮືອນພັກ ແລະ ຮ້ານອາຫານຕາມສັ່ງຢູ່ບໍລິເວນນໍ້າຕົກຕາດແຫ່ງນີ້.

ນອກຈາກແຫຼ່ງທ່ອງທ່ຽວທີ່ສໍາຄັນຕ່າງໆແລ້ວທ່ານໃດທີ່ສົນໃຈຢາກໄດ້ເຄື່ອງຫັດຖະກໍາເຄື່ອງປັ້ນດິນເຜົາ, ຫັດຖະກໍາຕໍ່າແຜ່ນ ເຜົ່າຕະລຽງກໍສາມາດຫາຊື້ຕິດໄມ້ຕິດມື້ກັບໄດ້ ແລະ ອາຫານປະຈໍາທ້ອງຖິ່ນຂອງແຂວງອັດຕະປືແມ່ນຕະໂໜດ ຜູ້ໃດໄດ້ໄປຢ່າລືມຢ່າພາດຊີມເດີ.

ສະແດງຄຳຄິດເຫັນ