Senglao content (728×90)

ເຈົ້າໜ້າທີ່ ອາວຸໂສອາຊຽນ ສືບຕໍ່ປຶກສາຫາລື

ໃນວັນທີ 11 ສິງຫາ ນີ້ ທີ່ນະຄອນຫລວງວຽງຈັນ, ໄດ້ຈັດກອງປະຊຸມ ເຈົ້າໜ້າທີ່ອາວຸໂສຂຶ້ນ ພາຍໃຕ້ການເປັນປະທານຂອງ ທ່ານ ອາລຸນແກ້ວ ກິດຕິຄຸນ ລັດຖະມົນຕີ ປະຈຳສຳນັກງານ ນາຍົກລັດຖະມົນຕີ, ທັງເປັນຫົວໜ້າເຈົ້າໜ້າທີ່ ອາວຸໂສອາຊຽນຂອງ ສປປ ລາວ, ໂດຍມີຫົວໜ້າເຈົ້າໜ້າທີ່ອາວຸໂສ ຈາກປະເທດ ສະມາຊິກອາຊຽນ, ຮອງເລຂາທິການໃຫຍ່ອາຊຽນ ທີ່ຮັບຜິດຊອບເສົາຄ້ຳ ປະຊາຄົມການເມືອງ-ຄວາມໝັ້ນຄົງ, ພ້ອມດ້ວຍຄະນະຜູ້ແທນ ເຂົ້າຮ່ວມ.

ກອງປະຊຸມເຈົ້າໜ້າທີ່ ອາວຸໂສອາຊຽນ ໃນຄັ້ງນີ້, ໄດ້ສືບຕໍ່ປຶກສາຫາລື ກ່ຽວກັບການຈັດຕັ້ງປະຕິບັດວິໄສທັດ ປະຊາຄົມອາຊຽນ 2025 ໂດຍສະເພາະ ແມ່ນແຜນແມ່ບົດ ສຳລັບເສົາຄ້ຳປະຊາຄົມການເມືອງ-ຄວາມໝັ້ນຄົງ ອາຊຽນ 2025 ທີ່ບັນດາຜູ້ນຳອາຊຽນ ໄດ້ຮັບຮອງເອົາ ໃນກອງປະຊຸມສຸດຍອດອາຊຽນ ຄັ້ງທີ 27 ໃນເດືອນພະຈິກ 2015 ທີ່ຜ່ານມາ ໃຫ້ມີປະສິດທິພາບ ແລະ ປະສິດທິຜົນ. ນອກຈາກນັ້ນ, ກອງປະຊຸມຍັງໄດ້ປຶກສາຫາລື ກ່ຽວກັບການ ຈັດຕັ້ງປະຕິບັດ ບັນດາຂໍ້ສະເໜີແນະ ຂອງໜ່ວຍການສະເພາະກິດ ລະດັບສູງ ເພື່ອສົ່ງເສີມຄວາມເຂັ້ມແຂງ ຂອງກອງເລຂາອາຊຽນ ແລະ ທົບທວນອົງກອນຕ່າງໆ ຂອງອາຊຽນ ພ້ອມໄດ້ດຳເນີນ ຂັ້ນຕອນການຮັບເອົາ ຊີເລ, ອີຢິບ, ອີຣານ ແລະ ມາຣົກ ເຂົ້າເປັນພາຄີ ສົນທິສັນຍາໄມຕີຈິດ ແລະ ການຮ່ວມມືຢູ່ ອາຊີຕາເວັນອອກສ່ຽງໃຕ້.

ພ້ອມດຽວກັນນັ້ນ, ເຈົ້າໜ້າທີ່ອາຊຽນ ຍັງໄດ້ປຶກສາຫາລື ກ່ຽວກັບການກະກຽມ ໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 28 ແລະ 29, ພ້ອມດ້ວຍບັນດາ ກອງປະຊຸມສຸດຍອດ ທີ່ກ່ຽວຂ້ອງ ເຊິ່ງຈະຈັດຂຶ້ນ ໃນວັນທີ 6-9 ກັນຍາ 2016 ນີ້, ທີ່ນະຄອນຫລວງວຽງຈັນ. ຂໍ້ມູນຈາກ: ຂປລ.

ສະແດງຄຳຄິດເຫັນ