ແຂ່ງຂັນແຕ່ງບົດເພງສີຂຽວ Green song contest

ໃນຕອນແລງຂອງວັນທີ 30 ກັນຍາ 2016 ຢູ່ທີ່ວຽງຈັນເຊັນເຕີ ໄດ້ມີການແຂ່ງຂັນແຕ່ງບົດເພງສີຂຽວ Green song contest ຈັດຂຶ້ນໂດຍ “ອົງກອນວຽງຈັນສີຂຽວ” ເປັນກຽດເຂົ້າຮ່ວມໂດຍ ທ່ານ ສົມສະໜຸກ ມີໄຊ ຮອງປະທານສະມະຄົມນັກຂ່າວ ສປປ.ລາວ, ທ່ານ ສົມສັກ ສະກຸນຄຳ ຮອງຫົວໜ້າຫ້ອງການວັດທະນະທຳ ແລະ ທ່ອງທ່ຽວ, ທ່ານ ບຸນປະກອບ ພັນຫາລາດ ຮອງຫົວໜ້າຫ້ອງການກະຊວງສິ່ງແວດລ້ອມ, ທ່ານ ວໍຣະສັກ ປຣະວົງວຽງຄຳ ຮອງຫົວໜ້າວິທະຍຸແຫ່ງຊາດລາວ, ພ້ອມດ້ວຍຜູ້ເຂົ້າແຂ່ງຂັນ ແລະ ສື່ມວນຊົນ.

ການແຂ່ງຂັນແມ່ນຈຳກັດອາຍຸບໍ່ໃຫ້ເກີນ 30ປີ, ຕ້ອງແຕ່ງເພງ ຫຼື ບົດກອນທີ່ກ່ຽວກັບສິ່ງແວດລ້ອມສີຂຽວ ສົ່ງເຂົ້າປະກວດຕາມຫົວຂໍ້ທີ່ວາງໄວ້ ແລະ ຄະນະກຳມະການຈະຄັດເລືອກຕາມຫົວຂໍ້ທີ່ວາງໄວ້ ຄັດເລືອກຄວາມມ່ວນຊື່ນຂອງບົດເພງ ແລະ ຄວາມຖືກໃຈຂອງບົດເພງ, ເຊິ່ງເງິນລາງວັນຊະນະເລີດອັນດັບໜຶ່ງແມ່ນ 3 ລ້ານກີບ, ຮອງຊະນະເລີດ 1,5 ລ້ານກີບ ແລະ ລາງວັນຊະນະເລີດປະເພດເດັກນ້ອຍ (ອາຍຸບໍ່ເກີນ 12 ປີ) 2 ລ້ານກີບ, ກະຕິການແຂ່ງຂັນແມ່ນຕ້ອງອັດສຽງ ແລະ ອັບໂຫຼດລົງໃນ ຍູທູບ (Youtube) ແລະ ແຊຣຢູ່ໃນສັງຄົມອອນລາຍ.

ສຳຫຼັບການແຂ່ງຂັນແຕ່ງເພງສີຂຽວໃນເທື່ອນີ້ ຈັດຂຶ້ນເພື່ອປຸກລະດົມໃຫ້ໄວໝຸ່ມມີຈິດສຳນຶກໃນບັນຫາການຖີ້ມ ແລະ ຈູດຂີ້ເຫຍື້ອຢ່າງຊະຊາຍ  ແລະ ຄວາມສຳຄັນໃນການແບ່ງແຍກຂີ້ເຫຍື້ອໃຫ້ຖືກຕ້ອງ. ປະຊາຊົນລາວຈຳນວນຫຼາຍຍັງບໍ່ມີຄວາມກັງວົນກັບສິ່ງແວດລ້ອມ ແຕ່ລະມື້ປະຊາຊົນຈຳນວນ 1 ລ້ານກວ່າຄົນຜະລິດຂີ້ເຫຍື້ອປະມານ 500 ໂຕນ ພາຍໃນນະຄອນຫຼວງວຽງຈັນ ແລະ ແຂວງອ້ອມຂ້າງ, ອີກຢ່າງໜຶ່ງຈຳນວນເຄິ່ງໜຶ່ງຂອງຂີ້ເຫຍື້ອດັ່ງກ່າວໄດ້ເກັບໄປຖີ້ມຢູ່ສະຖານທີ່ສະເພາະ ແລະ ສ່ວນອີກເຄິ່ງໜຶ່ງແມ່ນໄດ້ຖິ້ມຊະຊາຍຕາມສາທາລະນະ, ແຄມທາງ, ຖິ້ມລົງນໍ້າຂອງ ຫຼື ນຳເອົາໄປຈູດໃນເຂດຊຸມຊົນ ເຮັດໃຫ້ມີຄວັນທີ່ເປັນພິດຮ້າຍຕໍ່ຮ່າງກາຍ ແລະ ສິ່ງແວດລ້ອມ.

ບົດຄວາມແນະນໍາ

ສະແດງຄວາມຄິດເຫັນ