Senglao content (728×90)

ຊົມເຊີຍ​ຜົນສໍາເລັດ​ກອງ​ປະຊຸມ​ສຸດ​ຍອດ​ອາ​ຊຽນ 2016 ຢ່າງສຸດໃຈ.

ສປປ ລາວ ໄດ້ຮັບກຽດ ເປັນເຈົ້າພາບຈັດກອງປະຊຸມ ສຸດຍອດອາຊຽນ ຄັ້ງທີ 28, 29 ຖືວ່າ ເປັນຄວາມພາກພູມໃຈ ຂອງປວງຊົນລາວທັງຊາດ ເພາະຈະເຮັດໃຫ້ຊື່ສຽງ ແລະ ອິດທິພົນຂອງສປປລາວ ສູງເດັ່ນຂຶ້ນ ໃນເວທີພາກພື້ນ ແລະ ສາກົນ.

ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງໄດ້ອັດລົງດ້ວຍຜົນສໍາເລັດຢ່າງສະຫງ່າຜ່າເຜີຍ ທີ່ນະຄອນຫຼວງວຽງຈັນ ໃນວັນທີ 8 ກັນຍາ 2016 ນີ້ ເຊິ່ງເປັນການຍົກສູງບົດບາດຂອງ ສປປ ລາວ ຕໍ່ສາຍຕາປະຊາຄົມໂລກ.

ສປປ ລາວ ໄດ້ມອບປະທານອາຊຽນໃຫ້ແກ່ປະເທດ ຟີລິບປິນ ແຕ່ການເປັນປະທານອາຊຽນຂອງຟີລິບປິນຈະເລີ່ມຂຶ້ນຕັ້ງແຕ່ວັນທີ 1 ມັງກອນ 2017 ຊຶ່ງເປັນປີຄົບຮອບ 50 ປີ ແຫ່ງການສ້າງຕັ້ງອາຊຽນ.

ກອງປະຊຸມສຸດຍອດອາຊຽນຄັ້ງນີ້ ຍັງໄດ້ຕ້ອນຮັບການເຂົ້າຮ່ວມຂອງ ທ່ານ ບາຣັກ ໂອບາມາ ປະທານາທິບໍດີ ສ.ອາເມຣິກາ ຄົນທໍາອິດທີ່ມາຢ້ຽມຢາມລາວຄັ້ງປະຫວັດສາດ,ຜ່ານການຢ້ຽມຢາມຄັ້ັ້ງນີ້ທາງລັດຖະບານອາເມຣິກາຕົກລົງຈະໃຫ້ການຊ່ວຍເຫຼືອໃນຫຼາຍດ້ານເຊັ່ນ: ມອບ 90 ລ້ານໂດລາຊ່ວຍໂຄງການ​ເກັບ​ກູ້ລະເບີດບໍ່ທັນແຕກໃນໄລຍະ 3 ປີ, ຊ່ວຍສ້າງສະ​ຖາ​ບັນ​ໂພຊະ​ນາ​ການ ລາວ-ອາ​ເມ​ຣິ​ກາ ​ຈະ​ສ້າງ​ຂຶ້ນຢູ່​ທີ່​ບ້ານ​ດົງ​ໂພ​ສີ ເມືອງ​ຫາດຊາຍ​ຟອງ ນະຄອນຫຼວງ​ວຽງ​ຈັນ ມູນ​ຄ່າ​ຂອງ​ໂຄງການ​ແມ່ນ 3,7 ລ້ານ​ໂດ​ລາ ໄລຍະປະຕິບັດງານ 5 ປີ, ຊ່ວຍໂຄງ​ການ​ອະ​ນາໄມຂອງຊຸມຊົນ ແລະ ສະບຽງອາຫານສຳລັບແມ່ ແລະ ເດັກໃນຕົວເມືອງກຸ່ມເປົ້າໝາຍມູນຄ່າ 6 ລ້ານໂດລາ​ໄລຍະປະຕິບັດງານ 3 ປີ,ໂຄງການອາຫານສຳລັບໂຮງຮຽນ ຊຶ່ງລັດຖະບານອາເມລິກາ ພວມມີການສະໜອງການຊ່ວຍເຫຼືອໃນມູນຄ່າ 27 ລ້ານໂດລາ ໃນໄລຍະ 5 ປີ ແລະ ອື່ນໆ.

ສໍາລັບລາວ-ຣັດເຊຍ: ສອງຝ່າຍໄດ້ເພີ່ມທະວີການຮ່ວມມືຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແນ່ໃສ່ເຮັດໃຫ້ວຽກງານສືບຂ່າວທາງດ້ານການເງິນຂອງ ສປປ ລາວ ມີການຮ່ວມມືກັບສາກົນຢ່າງຮອບດ້ານໃຫ້ຫຼາຍຂຶ້ນ ສາມາດຕອບສະໜອງໄດ້ຕາມມາດຕະຖານສາກົນ ເຊິ່ງຈະສາມາດແກ້ໄຂບັນດາຂໍ້ບົກຜ່ອງຂອງ ສປປ ລາວ ກ່ຽວກັບວຽກງານດັ່ງກ່າວ. ສປປ ລາວ ໄດ້ເຂົ້າເປັນສະມາຊິກຂອງກຸ່ມ ອາຊີ-ປາຊີຟິກ ເພື່ອຕ້ານການຟອກເງິນ (APG) ເປັນອັນດັບທີ 36 ໃນປີ 2007.

ສໍາລັບລາວ-ຍີ່ປຸ່ນ: ສອງຝ່າຍໄດ້ເພີ່ມທະວີການເປັນຄູ່ຮ່ວມມືຍຸດທະສາດ ແລະ ຊຸກຍູ້​ການຮ່ວມ​ມື​ດ້ານ​ເສດຖະກິດ ການ​ຄ້າ ການ​ລົງທຶນ ການ​ສຶກ​ສາ ແລະ ວັດທະນະທຳ. ສອງຝ່າຍໄດ້ຕີລາຄາສູງຕໍ່ການຮ່ວມມືສອງຝ່າຍຜ່ານມາໂດຍສະເພາະແມ່ນຜົນສຳເລັດ​ຂອງ​ກອງ​ປະຊຸມລັດຖະມົນຕີ​ຕ່າງປະເທດ​ອາ​ຊຽນ ໃນ​ເດືອນກໍລະກົດ 2016 ຜ່ານມາ, ການ​ຊ່ວຍເຫຼືອ​ທາງ​ການເພື່ອ​ການ​ພັດ​ທະນາ (ODA) ຂອງ​ລັດຖະບານຍີ່ປຸ່ນຕະຫຼອດ​ໄລຍະ​ຜ່ານ​ມາ.                                                                  ສໍາລັບລາວ-ອົດສະຕຣາລີ: ຈະສືບຕໍ່ໃຫ້ທຶນການສຶກສາແກ່ລາວ, ໃນ​ໂອກາດທີ່​ທ່ານ Maicolm Turnbull ນາຍົກລັດຖະມົນຕີ ​ອົດສະ​ຕຣາ​ລີ ​ເດີນທາງ​ມາ​ຢ້ຽມຢາມລາວ. ໃນວັນ​ທີ 7 ກັນຍາ 2016 ທ່ານ​ໄດ້ເຂົ້າ​ຮ່ວມ​ພິທີ​ເປີດ​ນຳ​ໃຊ້​ຫ້ອງການ​ສະ​ຖາ​ບັນ​ລາວ-ອົດ​ສະ​ຕຣາລີ ແລະ ສົ່ງເສີມ​ພາສາ​ຕ່າງ​ປະເທດ ພ້ອມ​ທັງ​ມອບ​ທຶນ​ການ​ສຶກສາ​ໃຫ້​ແກ່​ນັກ​ສຶກ​ສາ​ລາວຈຳນວນ 31 ທຶນ. ຜ່ານ​ມາໄດ້​ມີ​ນັກສຶກ​ສາ​ລາວ​ທີ່​ຮຽນ​ຈົບ​ຈາກ​ປະເທດ​ອົດ​ສະ​ຕຣາ​ລີ ຫຼາຍ​ກວ່າ 1.200 ຄົນ.

ສໍາລັບລາວ-ສປຊ: ໃນ​ໂອກາດ​ທີ່​ທ່ານ Ban Ki Moon ເລຂາທິການ​ໃຫຍ່​ຂອງອົງການ​ສະຫະ​ປະຊາ​ຊາດ ​​ເດີນທາງ​ມາ​ຢ້ຽມຢາມລາວ.ໃນ​ວັນ​ທີ 6 ກັນຍາ 2016 ທ່ານໄດ້​ລົງ​ຢ້ຽມຢາມ​ໂຮງໝໍ​ເມືອງ​ສີສັດຕະ​ນາກ ນະຄອນຫຼວງ​ວຽງຈັນເພື່ອຕິດຕາມຄວາມຄືບໜ້າຂອງໂຄງການ “ປິ່ນປົວ​ເບິ່ງແຍງ​ຜູ້​ຊົມໃຊ້ ແລະ ຜູ້​ຕິດ​ຢາ​ເສບ​ຕິດ​ຂັ້ນ​ຊຸມຊົນ” ເຊິ່ງ​ໄດ້​ຮັບ​ການ​ຮ່ວມ​ມື​ຈາກອົງການ​ສະຫະ​ປະຊາ​ຊາດ ແລະ ອົງການ​ອະນາໄມ​ໂລກ ເລີ່ມ​ຈັດຕັ້ງ​ປະຕິບັດ​ໃນ​ປີ 2015 ຜ່ານ​ມາ ດ້ວຍ​ງົບປະມານ 1 ຕື້​ກວ່າ​ກີບ ຫຼື 130.000 ໂດ​ລາ.

ໃນວັນທີ 7 ກັຍາ 2016 ທ່ານ ທອງລຸນ​ ສີສຸລິດ ນາຍົກລັດຖະມົນຕີແຫ່ງສປລາວ ແລະ ທ່ານ ບັນກີມູນ ເລຂາທິການໃຫຍ່​​ອົງການສະຫະປະຊາຊາດໄດ້ປະກາດຢ່າງເປັນທາງການຮັບຮອງເອົາເປົ້າໝາຍການພັດທະນາແບບຍືນຍົງທີ 18  ແມ່ນເປົ້າໝາຍໃໝ່ທີ່ເພີ່ມເຂົ້າໃນຈຳນວນເປົ້າໝາຍພັດທະນາແບບຍືນຍົງທັງໝົດ 17 ເປົ້າໝາຍ ທີ່ໄດ້ຖືກຮັບຮອງໃນລະດັບສາກົນ.  ​

ສໍາລັບລາວ-ນີວຊີແລນ: ທ່ານ ຈອນຄີ ນາຍົກລັດຖະມົນຕີ ປະເທດນິວຊີແລນ ໄດ້ເປີດເຜີຍລະຫວ່າງການຢ້ຽມຢາມສູນເຝິກອົບຮົມເກັບກູ້ລະເບີດແຫ່ງຊາດທີ່ ບ້ານອີ່ໄລ ເມືອງນາຊາຍທອງໃນວັນທີ 7 ກັນຍາ 2016 ວ່າ: ລັດຖະບານປະເທດນິວຊີແລນ ໄດ້ປະກາດຕົກລົງຊ່ວຍເຫຼືອ ສປປ ລາວຮອບ    ໃໝ່ຈຳນວນ 10 ລ້ານໂດລານິວຊີແລນ ຫຼື ປະມານ 7,2 ລ້ານໂດລາສະຫະລັດ ເພື່ອປະກອບສ່ວນເຂົ້າໃນວຽກງານເກັບກູ້ລະເບີດບໍ່ທັນແຕກໃນສປປລາວໂດຍຜ່ານອົງການສປຊເພື່ອການພັດທະນາ ເພື່ອນໍາໃຊ້ເຂົ້າວຽກງານເກັບກູ້ລະເບີດຢູ່ແຂວງຊຽງໃນ 4 ຕໍ່ໜ້ານັບແຕ່ປີ 2017-2020. ຜ່ານມາລັດຖະບານນິວຊີແລນໄດ້ຊ່ວຍຈໍານວນ 4 ລ້ານກວ່າໂດລາສະຫະລັດ ເພື່ອຈັດຕັ້ງປະຕິບັດວຽກງານເກັບກູ້ລະເບີດໃນແຂວງຊຽງຂວາງນັບແຕ່ 2010-2015.

ສໍາລັບລາວ-ໄທ: ສອງຝ່າຍເຫັນດີເພີ່ມການສົ່ງອອກພະລັງງານໄຟຟ້າໄປປະເທດໄທ,​ສອງ​ຝ່າຍ​ຍັງໄດ້​ສືບຕໍ່​ຊຸກຍູ້​ພາກສ່ວນ​ກ່ຽວຂ້ອງ​ຂອງ​ທັງ​ສອງ​ຝ່າຍ ເພື່ອ​ເພີ່ມ​ທະວີ​ການ​ຄ້າ ແລະ ການ​ລົງທຶນ​ຂອງ​ໄທ​ຢູ່​ລາວ ໃຫ້ນັບ​ມື້​ຫຼາຍ​ຂຶ້ນ​ກວ່າ​ເກົ່າ. ​ສືບຕໍ່​ຮ່ວມ​ມື​ກັນຢ່າງ​ໃກ້ຊິດໃນ​ການ​ຕິດຕາມ​ບັນຫາ​ກຸ່ມ​ຄົນ​ທີ່​ບໍ່​ຫວັງ​ດີ​ຕໍ່​ສາຍ​ພົວພັນ ລາວ-ໄທ ການ​ຄ້າຂາຍ​ຢາເສບ​ຕິດ ການ​ຄ້າ​ຂອງ​ເຖື່ອນ ແລະ ບັນຫາ​ອື່ນໆ.

ສອງຝ່າຍໄດ້​ລົງນາມ​ໃນ​ບົດ​ບັນທຶກ​ຄວາມ​ເຂົ້າໃຈ (MOU) ວ່າ​ດ້ວຍ​ການ​ພັດທະນາແຫຼ່ງ​ພະລັງງານ​ຢູ່ ​ສປປ ລາວ ເພື່ອ​ສົ່ງ​ອອກ​ໄປ​ຍັງປະເທດ​ໄທ​ໃຫ້​ເພີ່ມ​ຂຶ້ນ​ເປັນ 9 ພັນເມ​ກາ​ວັດ ຈາກ MOU ສະບັບເດີມ​ທີ່​ກຳນົດ​ຂອບ​ການ​ຮ່ວມ​ມື​ໄວ້ທີ່ 7 ພັນ​ເມ​ກາ​ວັດ.

ນອກຈາກນີ້ບັນດາຜູ້ນໍາອາຊຽນກັບຄູ່ເຈລະຈາ ຕ່າງກໍເຫັນດີຈະສືບຕໍ່ສະໜັບສະໜູນ ສປປລາວ, ໄດ້ຢໍ້າຄືນຄວາມໝາຍໝັ້ນ ສືບຕໍ່ສ້າງປະຊາຄົມອາຊຽນໃຫ້ເຂັ້ມແຂງ ແລະ ຈະເລີນກ້າວໜ້າດ້ວຍການຈັດຕັ້ງຜັນຂະຫຍາຍ ວິໄສທັດຂອງປະຊາຄົມອາຊຽນ 2025 ກໍຄື ແຜນແມ່ບົດຂອງສາມເສົາຄໍ້າ.

ສະຫຼຸບລວມແລ້ວ ກອງປະຊຸມສຸດຍອດອາຊຽນຄັ້ງທີ 28 ແລະ 29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງທີ່ ສປປລາວ ເປັນປະທານໃນປີ 2016 ໄດ້ສໍາເລັດລົງດ້ວຍໝາກຜົນອັນຈົບງາມ.

ສະແດງຄຳຄິດເຫັນ