Senglao content (728×90)

ເລີ່ມມີການຄົບງັນແລ້ວບຸນຊ່ວງເຮືອປະຈຳປີ 2015

ງານບຸນອອກພັນສາປະວໍລະນາ ແລະ ບຸນຊ່ວງເຮືອປະເພນີ ປະຈຳປີ 2015 ທີ່ທ່າວັດຈັນ ເລີ່ມຂຶ້ນໃນ​ວັນ​ທີ 22 ຫາ 28 ຕຸລາ 2015 ນີ້, ແຕ່​​ປັດຈຸບັນ​ເຫັນ​ວ່າ​ ບັນດາ​ບໍລິສັດ, ຫ້າງ​ຮ້ານ ລວມ​ເຖິງ​ພໍ່ຄ້າ​ແມ່​ຄ້າ​ ຈໍານວນ​ຫຼວງຫຼາຍ​ໄດ້​ເລີ່​ມກະກຽມ​ສະຖານ​ທີ່ ​ແລະ ບາງ​ຮ້ານ​ກໍ​ໄດ້​ມີ​ການ​ຊື້​-ຂາຍ​ສິນຄ້າກັນ​ແລ້ວມາແຕ່ອາທິດຜ່ານມາ ​ໂດຍ​ສະ​ເພາະ​ແມ່ນ​ຮ້ານ​ຂາຍ​ເຄື່ອງນຸ່ງ​ຫົ່ມ, ​ເຄື່ອງ​ອຸປະ​ໂພ​ກ ​ແລະ ອາຫານ​ການ​ກິນ​ ປະ​ເພດ​ຕ່າງໆ  ​ເຂົ້າຫຼາມ-​ປີ້ງ​ໄກ່  ​ເຊິ່ງ​ແຕ່​ລະ​ມື້​ ກໍ​ມີ​ມວນ​ຊົນຈຳນວນ​ຫຼວງຫຼາຍ​ໄປ​ເລືອກ​ຊື້​ສິນຄ້າ ​ສົ່ງ​ຜົນ​ເຮັດ​ໃຫ້ການ​ສັນຈອນ​​ຢູ່​ເສັ້ນທາງ​ແຄມ​ຂອງ​ມີ​ຄວາມ​ແອ​ອັດ​ຫຼາຍສົມຄວນ.

ຕາມການ​ໃຫ້​ສຳພາດ​ຂອງ​ແມ່​ຄ້າ ໃຫ້​ຮູ້​ວ່າ: ​ໄດ້​ເລີ່​ມນຳ​ເອົາ​ສິນຄ້າ​ຂອງ​ຕົນ​ເຂົ້າມາ​ຂາຍ​ພາຍ​ໃນ​ງານ ​​ແຕ່​ທ້າຍ​ອາທິດ​ຜ່ານ​ມາ ​ເຊິ່ງ​ໃນ​ປີ​ນີ້ ທາງ​ພາກສ່ວນ​ຮັບຜິດຊອບ​ຈັດ​ງານ​ຕະຫຼາດນັດ ກໍ​ໄດ້​ມີ​ການຈັດ​ສັນ​ສະຖານ​ທີ່​ຢ່າງ​ເປັນ​ລະບຽບ​ຮຽບຮ້ອຍ ​​ໄດ້​ມີ​ການຈັດ​ແບ່ງ​ສະຖານ​ທີ່​ຂາຍ​ສິນຄ້າ​ແຕ່ລະ​ປະ​ເພດ​ຢ່າງ​ລະອຽດ ​ເຊັ່ນ: ຕາມ​ເສັ້ນທາງ​ສາມ​ແຍກ​ປາກ​ປ່າ​ສັກ ​ແມ່ນ​ຈັດ​ສັນ​ໃຫ້​ຂາຍ​ເຂົ້າຫຼາມ-ປີ້ງ​ໄກ່, ​ເສັ້ນທາງ​ແຄມ​ຂອງ​ເລີ່​ມ​ແຕ່​ສາມ​ແຍກ​ປາກ​ປ່າ​ສັກ ລົງມາ ​ແມ່ນ​ການວາງສະ​ແດງ​ສິນຄ້າ​ຂອງ​ບັນດາ​ບໍລິສັດ​ຫ້າງ​ຮ້ານ​ຕ່າງໆ, ຕໍ່​ມາ​ແມ່ນ​ການ​ຂາຍ​ເຄື່ອງນຸ່ງ​ຫົ່ມ, ​ເຄື່ອງ​ອຸປະ​ໂພ​ກ ​ແລະ ອື່ນໆ, ສ່ວນ​ບັນດາ​ເຄື່ອງ​ຫຼີ້ນ​ປະ​ເພດ ຊິ່ງຊ້າ, ມ້າໝູນ ​ແມ່ນ​ຈັດ​ໄວ້​ຢູ່​ຫາດ​ຊາຍ​ແຄມ​ຂອງ​ຕໍ່ໜ້າ​ວັດ​ຈັນ, ສ່ວນ​ຄ່າ​ເຊົ່າ​ສະຖານ​ທີ່ ທີ່​ທາງ​ພາກສ່ວນ​ຮັບຜິດຊອບ​ກຳນົດ​ໃຫ້ ​ແມ່ນ​ມີ​ລາຄາ​ເລີ່​ມຕົ້ນ​ແຕ່ 2 ລ້ານກີບ ຫາ 3 ລ້ານກີບ ​ຕໍ່ຫ້ອງ​ຂະໜາດ 4X4 ຕາ​ແມັດ, ສຳລັບ​ຄ່າ​ເຊົ່າ​ສະຖານ​ທີ່​ເຄື່ອງ​ຫຼີ້ນ​ຕ່າງໆ​ແມ່ນ 10 ລ້ານ ກີບ ຫາ 15 ລ້ານກີບ , ສ່ວນ​ຄ່າ​ເຊົ່າ​ວົງ​ດົນຕີ 15 – 20 ລ້ານກີບ ຕໍ່​ຄະນະ.

ພ້ອມ​ນີ້​ ຍັງ​ມີ​ການ​ຈັນ​ສັນ​ສະຖານ​ທີ່​​ຝາກ​ລົດ​ຢູ່​ຕາມ​​ແຄມເສັ້ນທາງ ​ແລະ ທາງ​ຮ່ອມ​​ຕ່າງໆ ຕາມ​ທີ່​ພາກສ່ວນ​ຮັບຜິດຊອບ​ກຳນົດ​ໄວ້ ​ເຊິ່ງ​ໃນ​ປີ​ນີ້ ລາຄາ​ຝາກ​ລົດ​ທີ່​ທາງ​ພາກສ່ວນ​ຮັບຜິດຊອບ​ກຳນົດ​ໃຫ້​ ມີ​ຄື: ລົດ​ໃຫຍ່ ລາຄາ 15.000 ກີບ/ຄັນ/ຄັ້ງ, ລົດ​ຕຸກໆ 10.000 ກີບ/ຄັນ/ຄັ້ງ, ລົດຈັກ 5.000 ກີບ/ຄັນ/ຄັ້ງ ​ແລະ ລົດຖີບ 2.000 ກີບ/ຄັນ/ຄັ້ງ. ສຳລັບ​ຄ່າ​ບໍລິການ​ຫ້ອງ​ນ້ຳ​ແມ່ນ​ລາຄາ 2.000 ກີບ ຫາ 5.000 ກີບ/ຄັ້ງ/ຄົນ.

 

12179606_1657353071207684_2015838299_n

Comments